Meghalaya leh NEC hotute kawm

Shillong-a kal minister Lalnghinglova Hmar chuan Thawhtanni khan Meghalaya deputy chief minister Prestone Tynsong chu a chenna inah a kawm a, kawng hrang hranga Mizoram leh Meghalaya thawhdun theihna an sawidun.
Mizoram Excise & Narcotics minister hian Meghalaya Home minister ni bawk Prestone Tynsong hi ruihhlo do kawngah state pahnihte tha taka thawhho a tul thu a sawipui a. A bikin Myanmar atanga ruihhlo tawlhruk, Mizoram a paltlang hnua Meghalaya-a man awm thin chungchangah inhriatthiamlohna leh harsatna awm loin state pahnih hotute tlang taka inbiak thin nise, an ti.
Shillong-a Mizo awmten harsatna an tawh thin chu Lalnghinglova Hmar hian thlenin, Meghalaya deputy CM chuan a lo ngai thutak hle a. An harsatna chinfel sak tur leh harsatna an tawh zui loh nana hma la turin an inkawm karah phone-in Meghalaya sawrkar official-te a hriattir nghal a. Shillong-a Mizo awmten harsatna an neih chuan direct-in emaw Mizoram sawrkar kaltlangin emaw a hnena thlen thin turin a chah a ni.
Mizoram leh Meghalaya chu tunhma atanga thiantha an nih thu an sawidun a. Deputy CM hian Mizoram sawrkar, chief minister leh Home minister-te duhsakna hlanin, state pahnih inthianthatna chu chhawmnun zel a duh thu Mizoram minister kaltlang hian a sawi.
Sports & Youth Services leh LESDE minister hian Thawhtanni vek khan North Eastern Council planning adviser Som Kamei, financial adviser Thanglemlian leh economic adviser Sherry Lalthangzo te chu an office-ah kawmin, Sports & Youth Services leh LESDE department-a thawhhona awm thei hrang hrang a sawipui a ni.