College building sak mekah MLA leh corporator lungawilo

Govt Aizawl North College Ramhlun North-a RUSA hnuaia building extension tih mek chu Nilaini khan Aizawl North II bialtu MLA Dr Vanlalthlana leh AMC Ward No.III corporator C. Lalchhandami ten tlawhin, sak a nih danah thil fel tawk lo awma hriain an lungawi lo hle tih sawi a ni.
MLA leh corporator-ten an tlawh college building extension hi Skyridge Construction & Consultancy Services hna a ni tih an sawi a. RUSA hnuaiah cheng nuai 150 senga sak zawh tura tih niin, hna hi October 2019-a thawh tan a ni a, November 2022-a zawh tura ruahman a ni. Skyridge Construction & Consultancy Services hian RUSA hnuaiah Rs. 21,37,00,000/- work order hmuin, Mizorama college hrang hrang sak hna an thawk a ni.
Govt ANC building sak a nih danah hian thil fel tawk lo awma hriain Aizawl North II bialtu MLA leh AMC Ward No.III corporator hi an lungawi lo hle tih ZPM thuchhuak chuan sawiin, duhthusam tawk lohna lai tam tak a awmin an hmu tih a sawi.
‘Hna a nihna tur anga thawh a ni lo leh thawh zawh hun tura ruahman anga zawh a ni lo chu an ngaimawh bakah hna an thawh muan avanga zirlaiten class an kal theih loh phah hial chu pawi an ti a. Tuna hna la thawh zawh lohte pawh a rang thei ang bera thawk zoa, zirlaite hmalam hun thui tak an kutah a awm a ni tih inhria a, zirna in tha leh zahawm tak siam turin hnathawktute pawh an chah a ni,’ a ti.