Mizoram Law College building sak mek chu a chhiat avangin sak chhunzawm zel tlakah an ngai lo tih ZPM Thalai chuan an sawi.
ZPM Thalai Hqrs. thuchhuak chuan February 28 khan Law College building sak mek hi an tlawh a, a hna a chhia in, ban leh beam inzawmna a khi chat vek a, an hmanraw hman a chhe hle a ni tih a lang bawk, tia sawiin, sak zawm zel tlakah an ngai loa, zirlaite himna atan building sak mek hi thiat vek a, a bul atanga sakthat a nih leh theihna’n hma la turin Mizoram sawrkar an phut tih a sawi.
Mizoram Law College building hi sak zawh hun tiam atanga kum khat a ral hnu ah hna zawng zawng atanga zaa 40 chauh la thawh a nih laiin, a sakna tur sum RUSA atanga ruahman Rs. 1,70,00,000 atangin Rs. 1,17,96,000 pekchhuah a ni a, a sak hun chhung March 2023 thlenga pawhsei a ni bawk tih sawiin, ‘Sawrkar leh a satute inkarah hnungthak inhiah tawnna a awm em ni, tih hi kan zawhna a ni a, sawifiah ngei turin sawrkar kan phut a ni,’ a ti.
MNF sawrkar hnuaia contract hna chhe lutuk hlir mipui min hlui chu mipui zah lohna leh tham lohna lian takah an ngai tih ZPM Thalai hian sawiin, ‘Zirna in lehzel pawh hetianga suasam a ni hi pawi kan ti a. MNF sawrkar hnuaia chhe lutuka zirna in sak hi zirlaite zah lohna leh zirna ngaihthahnaah kan ngai a ni,’ thuchhuah chuan a ti.
College building thiah vek phut
Get real time updates directly on you device, subscribe now.