Colombian Air Force thlawhna tlaah mi 66 thi

A thlawh chhuah hnu lawka an ram khawthlang lama Colombian Air Force thlawhtheihna tlaah mi 66 an thi a, mi tam takin hliam an tuar bawk niin thuneituten an sawi.
Air force commander Carlos Fernando Silva Rueda chuan thlawhnaah hian sipai 114 leh thawktu 11 an chuang tih a sawi.
Thlawhtheihna hi US siam, C-130 Hercules, sipai phurhna atana hman a ni a, Putumayo province-a Puerto Leguízamo khaw bulah Thawhtanni zing (India-a tlai lam)-a tla a ni.
A hmuna emergency worker tirhte chuan a tlakna laiah hian dam chhuak an zawng nghal a, a tlak chhan hi chhui chian mek a ni bawk.
Colombian Defence Minister Pedro Sánchez-a chuan Lockheed Martin siam Hercules C-130 transport plane hian ‘Puerto Leguízamo atanga a thlawh chhuah laiin tawhsual rapthlak tak a tawk a, kan sipaite a phur a ni’ tih a sawi.
Peru ramri bula thil thleng hi ram tan a lungchhiatthlak hle niin a sawi a. A hnuah thlawhnaa phurh puak theite chu a kan hnuah a puak zui niin a sawi bawk.
Sipai thuchhuah chuan sipai 58 an thi a, air force mi paruk leh police officer pahnih an thi bawk niin AFP chuan a tar lang.
Sipai lam mi pahnih pawhin Reuters hnenah mi 66 an thi tih an sawi bawk.
He thil thleng hi tun hnaia Colombian Air Force tawhsual tawhna lian ber pakhat a ni a. Tual chhung chanchinbuten thlalak an tihchhuahah chuan a hmun atang hian meikhu a chhuak nasa hle a, sipai phur truck-te pawhin an pan mek.
Tual chhung chanchinbu site-a thlalakah pawh tual chhung miten sipai hliam tuar nia langte chu a tlakna hmun atanga hian lirthei tê chi hmangin damdawi in an panpui niin a lang bawk.
Thla hmasa khan Bolivian Air Force C-130 Hercules, pawisa note phurtu chu an ram chhim lamah a tla a, mi 20 chuang an lo thi tawh.