Congolese president-in na zawkin M23 beih tum

Congolese president-in na zawkin M23 beih tum
Congolese President Félix Tshisekedi chuan an ram khawchhak lam, Goma-a Rwanda-in a puih M23 hel pawl lut mekte chu na zawkin an bei dawn tih a sawi a. Hetih lai hian helho hian chhim lamah ram an zauh zel.
TV-a thuchah a sawiah ‘na tak leh tum bul tak neiin’ an ram beitu chu an chhang let mek tih a sawi a, a beitute chu ‘mi firfiakte’ tiin a sawi bawk.
Ram dangte chu venhimna thila buaina a awm mek laia ‘an chet chhuah loh avangin’ a dem thu a sawi bawk.
Chawlhkar eng emaw zat helhovin ram laa tharum an thawh mek karah mihring khawsak a harsa ta hle a, ram tam takin indona titawp turin an ti hlawm.
Nilaini zan khan Tshisekedi-a chuan Congolese-te chu an inlungrual a, sipaiten an ram hloh chhuh let tuma an beihna chu an thlawp vek tih a sawi.
“Thil chiang tak chu, Democratic Republic of Congo hian a ram hi tihduhdahin a tihchhiattir dawn lo. Kan bei ang a, hnehna kan chang ang,” a ti.
Indona avang hian mi 5,00,000 chuangin an chenna an chhuahsan tawh a, mihring mamawh thil a tlem tak zet tawh tih UN chuan a sawi.
Indona a chhuah atangin khawpuiah hian electric leh tui a la awm lo va, eitur a vâng hle bawk.
Africa khawchhak lam ramte chu Nilaini zan khan Kenya President William Ruto-a kaihhruaiin an thukhawm a, Tshisekedi chu a tel ve lo va, ‘buaina chu muanawm taka ching fel turin’ a ti.
Thutkhawmah hian Rwanda President Paul Kagame bakah member ram dang – Burundi, South Sudan, Tanzania leh Somalia hruaitute an tel.
Ram hruaitute hian ‘DR Congo sorkar chu buaina awm meka a kaihhnawihte be thuai turin’ a ti a, heng zingah hian M23 leh ralthuam keng pawl dangte pawh an tel.
Tshisekedi hian M23 hi biak a duh lo va, anmahni puitu nia sawi, Rwanda biak erawh a hreh lo.
Africa khawchhak lam ram hruaitute hian chhim lama ram tangrual, Sadc te nen thil tha zawk a awm theih nana sawiho ni se an ti a. Heng pawl hnihah hian DR Congo hi a tel ve ve.
Sadc hian Zirtawpni khan Zimbabwe-ah special summit a ko nghal a, DR Congo buaina hi an sawi.
Hetih lai hian Angola chuan Congolese leh Rwandan hruaitute chu rang taka Luanda-a inhmu turin a sawm.
Angola hi M23-in hma an lak dawn lai vel, December-a inbe tura lo ti tawhtu kha niin East African Community kaihhruaia sawihona pawh hi amahin a rawt chhuah a ni.
M23 hian hma an lak meknaah hian Goma hi an thunun deuh vek tawh a, hma an la sawn belh zel bawk.
Chhim lam pan zelin DR Congo khawchhak lama khawpui lian pahnih, Bukavu, lam an hawi a, Congolese sipaiten lo dan tumin an inring bawk.
Rwanda-a Great Lakes ambassador Vincent Karega chuan M23 hian khawchhak lam thununa an khawpui ber, Kinshasa lam hawi zel an tum niin a sawi.
UN, European Union leh ram hrang hrangte chuan Rwandan sipaite chu DR Congo chhuahsan turin an ti.
DR Congo leh UN hian Rwanda-in M23 hi an pui a, Goma pawh an thutchilh niin an sawi a. Rwanda hian an puih loh thu an sawi thung a, Congolese thuneitute hian hel puiin Kigali-a sorkar paih thlak an tum zawk tih an sawi ve thung.
UK leh Germany chuan M23 hma lakna duh lova Rwanda hnena puihna a pek thin tihtawpah an vau mek.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More