Hamas-in an mi hren pariat chhuah leh

Hamas-in an mi hren pariat chhuah leh
Hamas-in Gaza-a an hren mi pariatte chu Israel nena inkahhai an puana an inremna angin an chhuah leh ta.
Mi an chhuahte hi Israeli pathum leh Thai panga niin Red Cross kutah an hlan a, Israeli sipaite kutah hlan chhawn niin Israel luhpui an ni.
Ningania mi hren chhuah hi inkahhai puan inremna anga Hamas-in mi an hren an chhuah tum thumna a ni a, Israel pawhin Palestinian mi an man khawm zinga mi 110 an chhuah ve leh bawk.
January 19-a inkahhai an puan atangin Hamas hian mi an hren 15 an chhuah ta a, mi 82 an la kawl.
Israeli sipai kum 20 mi, Agam Berger-i chu Ningania chhuah hmasak ber niin hmai tuam silai kengten Haza hmar lam, Jabalia-ah khawpui chhe nuaih karah an hruai chhuak.
Civil mi pungkhawmte chu Hamas fighter-te hian hnawt kiangin dawhsan an siamah an dintir a, certificate an hlan hnuah Red Cross hnenah an hlan zui.
Darkar hnih chuang hnuah chhim lama Khan Younis-ah mi dang pariat chu hruai chhuah leh an ni a. Silai kengten vengin mipui pungkhawmte chu an au chuah chuah a, thlenkhatin an mobile phone-in thla an la a, Red Cross-in lirtheia an nghahnaah an pe chhawng.
Khan Younis-a mi hren an hlanna hi Israel-in Hamas hruaitu an thah tak, October 7-a Israel an beihnaa an thluak bur ber, Yahya Sinwar-a chenna thin kawtah neih a ni a. Sinwar-a hi Israeli sipaiten Rafah-ah October, 2024 khan an that a ni.
Berger-i bakah hian Israeli civil mi Arbel Yehud, 29, leh Gadi Moses, 80, te chhuah an ni a. Lova inhlawha awm Thai – Pongsak Thaenna, Sathian Suwannakham, Watchara Sriaoun, Bannawat Seathao leh Surasak Lamnao te chhuah an ni bawk.
Hamas-in Israel an beih tum khan mi 1,200 chuang an thah bakah mi 251 chu hren zui turin an man a. He thil thleng hi indona chhuahna leh Gaza a chhiat vek chhan a ni zui ta a ni.
Israel-in hemi phuba laa thla 15 chhung Gaza beia Hamas chhut chimih tuma a thawhnaah Palestinian 47,300 chuang an thi tawh niin Hamas enkawl health ministry chuan a sawi.
Inkahhai an puan atangin Israel lian an rama bomb tihpuah leh tleirawlte beitua puh an man Palestinian 290 chu an thubuai titawpin a chhuah ve tawh.
An mi chhuahte hian a tlangpuiin West Bank, East Jerusalem leh Gaza an pan tlangpui a, 70 chuang, pawi khawih nasa zual chu anmahniin an phur chhuak.