Congress a sawrkar chuan pension scheme hlui kalpui a ni ang – Lalsawta

Congress a sawrkar a nih chuan Mizoram sawrkar hnuaia thawkte tan pension scheme hlui kalpui tum a ni dawn tih an party president Lalsawta chuan a sawi.
	Nilainia Congress Bhavan-a inkhawmah Lalsawta chuan 2010 September 1 hmaa sawrkar hnathawk lak kum 25 aia naupang tam tak an awm tih sawiin, hemi hmaa an service 'regularise' hman loa a hnua 'service regularise' an nih chuan New Pension Scheme (NPS) hnuaia awm tur chu mi 9000 vel nia hriat an ni, tiin, "Heng mi hi chawhrualin kum 25 ni ta se, kum 2045 August-ah an pension dawn a.
Hemi rual chiah hian Old Pension Scheme (OPS) hnuaia thawk ho an zo (zero) ve chiah thung ang. September 2045 atang hian OPS hnuaia mi pension pek tur a nei lo nghal chiah bawk. Pension chhuak thar pek tur nei lo mah se, mi 40000 vel kha kum 25-30 chhung vel chu 'monthly' pension/ family pension a pek zui a la ngai tho ang," a ti.
	Chutih hunah chuan sawrkar hnathawk nghette NPS an nih vek tawh dawn avangin tuna new monthly matching contribution cheng vaibelchhe 4.5 vel hi vbch 45 a tling daih thei dawn tih sawiin, kum khat chhung phei chuan vbch. 540 a tling thei dawn tih a sawi.
	"Chutiang a nih chuan OPS leh NPS-a sawrkar sum sen tur chu rei tak a la sang chho hle reng dawn a. Sawrkarin NPS-a hman reng avanga sum kawng hniha a hman reng loh hun tur chu OPS hnuaia pensioner leh family pensioner an awm miah loh hun chauh a ni dawn a, kum 50 vel a la ni dawn. Sawrkar tan hian OPS hi hmang leh vek se, a zangkhai thlak theih hmel zawk a ni," a ti. 2023 MLA inthlana Congress party a sawrkar a nih chuan OPS hi kalpui leh an tum tih a sawi a ni.