Women’s reservation bill sawihona nei

Lok Sabha a Women’s Reservation Bill sawihona chuan Congress leh BJP te inbeihna a siam a. Congress chief hlui Sonia Gandhi chuan Other Backward Classes reservation ngiat nghalin hei bakah hian bill chu kalpui nghal a phut bawk a.
Hei hi chhang letin BJP MP Nishikant Dubey chuan Congress party te chu ‘political lam hawi’ behchhana thil thar sawiah puhin Women legislator te tana reservation sawi laiin OBC quota sawi chhuah a ni lo hrim hrim a ti bawk.
Opposition atanga sawi hmasa berin Sonia Gandhi chuan an party chuan Women’s Reservation Bill chu an thlawp tlat thu sawiin chutihrual chuan hmeichiha te tana 33% quota siamah Other Backward Classes reservation a awm ve tur a ni a ti thung.
Hei bakah hian Women’s Reservation Bill sawi chuan lungchhiaa a siam thu sawiin, a chhan chu local body inthlana hmeichhiate tana seat reserve chu a pasal boral tawh Rajiv Gandhi hmalakna vang a nih thu a sawi bawk.
Congress chief hlui chuan, “Indian National Congress aiawhin Nari Shakti Vandan Adhiniyam hi ka thlawp a ni. Meikhu-a khat choka atangin flood-lit stadium thlengin, Indian hmeichhiate zinkawng chu a thui em em a, tunah chuan an tum ram an thleng ta” tiin a sawi.
Hmeichhiate tan Independence neih nan mipa te nen inlungruala an beih thu sawiin, chuvang chuan new India a piang a ni a ti bawk.
“He bill chungchang sawi hian thinlung a hneh tak zet a, a chhan chu local body inthlana hmeichhiate tana seat hauh sak tura constitutional amendment siam chu ka pasal Rajiv Gandhi-an a pharh a ni a. Congress sorkar PV Narasimha Rao kaihhruai in a passed a. Rajiv Gandhi duhthusam chu a zahve chauh tihhlawhtlin la niin, tuna bill passed hmang hian a puma tihhlawhtlinin a awm dawn a ni” tiin a sawi bawk.
Sonia Gandhi chuan an party chuan bill chu an thlawp laiin hmeichhiate chu an rights la nghak rei tura tih an nih thu a sawi a. “Kum eng zah nge an nghah dawn kum hnih, kum li nge kum riat? Chu chu a dik em ni? Congress chuan he bill hi tuna hman nghal a ngiat a ni. Caste census pawh kalpui nghal ni se, SC, ST leh OBC community ah te pawh hmeichhiate tan reservation siam nghal ni bawk se. Sorkar chuan hemi kawngah hian hma la nghal vek bawk se la, tihkhawtlai chu hmeichhiate laka diklo taka thiltihna a ni” tiin a sawi bawk.
BJP MP Nishikant Dubey chuan bill chuan SC leh ST community hmeichhiate tan provision a neisa a ti a, congress leh opposition te chuan kum tam tak chhungin engmah an ti duh lo va, Prime Minister Narendra Modi leh BJP te chuan kalpui tura huaisenna an nei a ni a ti ve thung.
“Prime Minister chuan tun hi he bill pass tura hun tha tiin a sawi a. He bill pharh a nih theih nana special session a ko hi kan chhuang a, he rama hmeichhiate a zahzia a tarlang a ni” tiin a sawi bawk.
Congress-te chu sawiselin Dubey chuan, “He ram hi constitution hmanga kal a ni a. A hma zawngin panchayats leh local bodies-ahte hmeichhiate tan reservation an siam a. Mahse, OBC reservation bik an sawi ngai lo, tunah political hawi zawnga la-in an sawi chhuak ta a ni” a ti bawk.
“Tunah reservation chu kum 2024 atangin kalpui nghal tur (Census leh delimitation tel lovin) in ti a. Rservation hman tlak loha siam hi in duh tihna em ni? Women’s reservation hi lollipop ang maiah in ngai em ni? PM in a bul tan tawh a hlen ngei thin thu a sawi a. Tunah bill chu pharh a ni tawh a, hmeichhia ten an rights an nei thei tawh ang a, tute mahin an dang thei lovang” tiin a sawi bawk.
He bill hi Thawhlehni khan Lok Sabha-ah pharh niin Lok Sabha mai bakah State Assembly tin seat a hmeichhiate tana 33% seat hauhna tur a ni a. Opposition Congress te pawhin an thlawp avangin House pahnih paltlang mai tura ngaih a ni.
AIMIM hotu Asaduddin Owaisi chuan Bill chu “anti-OBC, anti-Muslim” ti nghal thungin, inthlan hmaa rilru lakpenna tura ruahmanna a ni a ti ve thung.
“Eng vangin nge OBC leh Muslim hmeichhiate huam tir ve a nih loh? Muslim hmeichhiate hi population atanga 7% vel an ni a, mahse, Lok Sabha a tel pha chu 0.7% chauh an ni. Modi sorkar hian OBC leh Muslim hmeichhia te tel duh lovin Savarna hmeichhia te tel chauh a duh a ni” tiin a sawi bawk.
Owaisi chuan Muslim hmeichhiate chuan an gender leh sakhua avangin entleuna chihnih an tawk a ti bawk a. An tana reservation siam a nih ve loh chuan ‘Hindu majoritarianism nationalism nasa zelah leh BJP tena Hindu vote bank an siam zelah Muslim aiawh te chu tlem zelin an tlem belh zel mai dawn’ tiin a sawi bawk.
Prime Minister chu OBC a nih chuan eng vangin nge a community te ngei pawh a ngaihsak loh? tiin zawhna a siam bawk.