Congress hruaitu leh union minister hlui Kalmadi a thi

Congress hruaitu hlui, union minister hlui, sport-a inrelbawlna lama hmingtha tak, Suresh Kalmadi-a chu Thawhlehni zing khan Pune-ah kum 81 mi niin a thi.
Kalmadi-a hi 2010 Delhi Commonwealth Games (CWG) Organising Committee hotu a nih laia ei rua puhna awm avangin politic a kalsan a. Kum 2011 khan man niin a nihna pawimawh hlipin vantlang hmuhah a inlar zui ta ngai lo a ni.
Indian Air Force-a squadron leader thin leh National Defence Academy-a instructor ni thin hi a hna a chawlhsan hnuah Poona Coffee House-ah inbunin heta tang hian politic a khel tan a, kum 1974 khan a pa, Shamarao Kalmadi-a thianpa, socialist leader Nilubhau Limaye hnung a zui tan a ni.
Coffee house atang hian thian tam tak siamin Congress hruaitu thin, Sharad Pawar-a nen inkawmngeihin Congress-ah a inhnim phum zui a, kum 1977 khan Pune Youth Congress chief atan ruat a ni ta a ni.
Emergency puan hun laiin Prime Minister Morarji Desai-a duh loh lantirna lian tak Pune-ah huaihawiin Congress hruaitu, Sanjay Gandhi-a mit a la nghal a, inkawmngeih zuiin a hnuah Rajiv Gandhi-a nen pawh an inzui ta zel a ni.
Gandhi chhungkua leh Pawar-a hnung zuiin a lian zel a, Pawar-a chhuaka Congress (S) a din khan Kalmadi-a hi thalai president a ni zui a. Rajya Sabha-ah kum 1982 atanga 1995 thleng vawi thum member a ni a, kum 1998 khan rei lo te a ni leh bawk.
Kum 1996, 2004 leh 2009-ah Lok Sabha MP atan Pune-ah thlan tlin a ni a. PV Narasimha Rao-a sorkar (1995-1996) khan minister of state for railways a ni a. Mumbai-a Victoria Terminus chu Chhatrapati Shivaji Terminus tia thlak kha a kaihhruai hun lai a ni.
Maharashtra State Athletics Federation-a head ni thinin Athletics Federation of India-ah selection committee a ni thin a, Indian Olympic Association chief a ni zui bawk.
Kum 1983 atanga tan, Pune International Marathon leh Pune Festival bul tantu zingah a tel a. Pune-in National Games 1994 leh Commonwealth Youth Games 2008 a thlenah pawh a thawh hlawk hle.