Congress party chuan rilru hrisel nei chunga ram kaihhruai leh hmalak dan turah hriat tur tulte an zir.
Zirtawpnia Congress Bhavan-a political session-ah party mi kalkhawmte chu Mizoram University Department of Psychology head Prof. Zoengpari chuan “Rilru hrisel tak nena ram kaihhruai leh hmalak dan turte” tih thupui hmangin zirtirna a pe a. Mihring nunhona hrim hrim piahlamah politics khawvelah pawh rilru hrisel neih pawimawh zia a sawi.
-- Advertisement --
Rilru hrisel chuan midangte nena inlaichinna leh inkungkaihna tha leh thuk tak a neih thin thu te, rilru hrisel lo chuan midangte nen inlaichinna tha an neih tak tak theih loh thu te sawiin, “Rilru hrisel nei turin mahni nihna inpawmthiamna (self acceptance) atangin tan a ngai a. Mahni nihna inpawm thiam chuan a bula awmte pawh an nihna angin a pawm thiam a, a bula awmte, a thawhpuite pawh phurna tam tak a pe thin”, a ti.
Mahni hnam leh ram zahawmna humhim leh chawisan kawngah rilru hrisel put a pawimawh, tiin, chutiang rilru pu lo tan ram hruaitu tha nih a harsa tih a sawi a. Congress party hruaitute chu ram hruaina kawnga rilru hrisel tak nei turin a fuih.
MPCC thuchhuak chuan, ‘Congress party-in insiamthat tuma hma a lakna kawngah headquarter hruaitute rilru puthmang siamthat a ngaipawimawh hle a. Chutiang tur chuan, revival speaker-te, rawngbawltu pawimawhte leh mithiam rualte zirtirna pe turin thu sawi tur leh zirtirna pe tura sawm an ni tawh a ni,’ a ti.