Congress tichhetu Samajwadi Party

Madhya Pradesh State Assembly Election lo awm turah Samajwadi Party chu Congress tan tichhetu mai niin an sawi. Assembly election-a seat insem chungchangah SP chuan an inremna a bawhchhia a, SP chuan Uttar Pradesh-a an thawhpui Congress Party chu Madhya Pradesh-a inthlan lo awm turah seat chuh ve turin a ti leh si a ni. SP Chief Akhilesh Yadav chuan MP-a Janata Dal United (JD-U) te hnen ah thu sawiin a huho a campaign dan tur te an sawiho a ni. Hei mai nilo hian UP-a an thawhpui Apna Dal (K) leh Mahan Dal te hnen ah MP Assembly election-ah seat chuh ve turin a ti bawk a ni.
Samajwadi Party hruaitu Akhilesh Yadav chu JDU thutlukna siam-MP election-a seat 5 chuh an tum ve chungchangah a lawm hle a, party pahnih te chuan a huho-in campaign an neih tur thu a sawi a ni. SP hotu Yadav chuan Apna Dal (K) hotute MP leh UP inri na bul bawr velah an party chuan chuan seat chuh ve turin a ti a ni. Zirtawpni kal ta khan Apna Dal (K) hotupa Krishna Patel leh legislator nilai Pallavi Patel te chu Akhilesh Yadav nen an inkawm ho a ni. He an inkawmhona ah hian MP Assembly election chungchang pawh an sawiho a. Apna Dal hotupain a sawi dan chuan SP hotupa hian MP election-ah a tlem berah seat 5 tal chuh ve tura a tih thu a sawi a ni. Apna Dal (K) party hi Kurmi hnam zingah a lian hle maia, MP leh UP te inri-na lai Bundelkhan ah candidates an siam ve dawn a ni.
Zirtawpni kal ta khan SP hotupa chuan Mahan Dal party hotu lu ber a hmu ve bawk a, Mahan Dal hi UP-a SP thawhpui pakhat niin MP election-a seat chuh dan tur chungchang an sawi dun a ni. Mahan Dal hotupa Keshav Deo Maurya chuan SP nen tang dunin MP election-ah seat 5 an chuh ve tur thu a sawi a ni. Kum 2022 UP election ah Mahan Dal leh Apna Dal te hian SP nen thawkhoin election an lo hmachhawn tawh a ni. Mahan Dal hotupa chuan MP assembly election ah pawh hian kan thawkho leh anga hnehna kan chang leh ngei ang, a ti a ni. Hetih lai hian central-a sorkarna siam tum meka thawhhona I.N.D.I.A-ah chuan thawkho party pahnih Congress leh Samajwadi Party te inkarah MP election-a seat insem chungchangah innghirnghona a awm ve leh ta thung a ni. SP hian MP-ah seat ruk a beisei laiin Congress hian seat 4 chiah a pe phal a. SP chuan MP election-a chuh tur candidate 40 te a puang tawh a, party dang thawh pui tur a la zawn belh zel bawk a ni.