Consumer huaisente hnehna Thenkhat

Lallunghnema
Charity Lodge
Cont: 9862288182

Chawlhkâr hmasa khan Quality Mark chungchang ka ziak a. Kha thil kha Consumer zawng zawngte hriat ngei ngei tur a ni a. Consumer-te Dikna leh Chanvo humhalhna atana hmanraw tangkai ber zinga mi a ni.
Bungraw chhia lei hi hlohna a ni a. Khawl chhia, hman tlak loh lei hi chhiatna a niin chânna a ni tel bawk. Mî Service tha lo lei hi buaina za khua a tling thin.
Entir nan: Thlawhtheihna ticket i lâk pawhin i hriat ngei ngei tur, i kawl that tur, chhin chhiah tha ang che. Thlawhtheihna company-te hi service provider-te zinga mi an ni.
I thil lei tur chu i lei hmâin en chiang hmasa la, i ngaih a that hnuah chauh thutlûkna siam thin ang che. Hetiang a, fimkhur nun hi Japanho ze ropui a ni e, an ti! Hnam entawn tlak, hnam rinawm leh ropui an ni.
Dawrkaiten an bungrua an fak mawi chiam avangin lei turin thutlûkna siam mai suh. Inthlahrung lovin i duhthlannaah innghat rawh. Mî i va dawrin zâm reng reng suh. Hlau hek suh. Hman hmawh taka thil lei tura thutlukna i siam chuan, a tuartu tur chu nangmah bawk i ni ang. Chu chu hria la, dik tak leh fel taka thil tih hi mi puitling awm dan tur a ni.
Thil zuartu chu nêl takin dawr la, leitu pawimawhna lantir nghal zel ang che.
Tun tumah hian Consumer 3(pathum) hlawhtlinna tawi tê têin ka sawi dawn a ni. Pakhat chu Mizoram chhunga mi a ni a, pahnih dang chu Mizoram pawn mite an ni.
Ka thu lâkna hi Telangana Today 26/03/2026 chhuak a mi a ni a. He Chanchinbu Publication hi Consumer International WhatsApp Group – a post ka hmuh a ni a. Consumer – te tibengvartu atan tiin ka han ziak chhawng a ni.
Hetiang hian sawi ila:
*Thlawhtheihna passenger bungrua tihbosak thu:
Jammu & Kashmir – a Consumer Court pakhat chuan Thlawhtheihna passenger pakhat chuan an thlawh laia a bungrua tihbo a nih avangin mawhphurhtu thlawhtheihna Company pakhat Indigo chu Rs 1.19 lakh chawi turin thutlûkna (judgement) a siam a. Complainant – te hian Saudi Arabia a tum hmun (airport) Dammam atangin Srinagarh an pan a. He Thlawhtheihna a an thlawh chhung hian an check – in – luggage chu a bo ta vek a ni. Heng khualzinte hian Consumer Court – ah Indigo Air hi an khing a. Indigo chu cheng nuai khat chuang zet chawi turin hrem an ni ta a ni.
Rêl khualzin thiam chantir thu ve thung:
Railway Ministry chuan Rail(rêl) a chuang passenger – te ei tura chhawp chhuah chhunga changpat ( worm) a lo awm avangin ei tur petu (siamtu) pawl Vande Bharat Meal contract chu a tihtawp sak a. He Railway hi Patna- Itanagar Vande Bharat Express a ni a,chêng nuai 50 (Rupees fifty lakhs) a chawitir bawk a ni. Railway Ministry chuan Ministry ngeiin a din Company The Indian Railway Catering & Tourism Corporation (IRCTC)chu an thawhchhiat (service deficient) êm avangin Rs 10 lakhs a chawitir bawk.
Hetiang hi thil thlen dan chu a ni:
World Consumer Right Day March 15 takah khan Vande Bharat train-a khualzin 7-te chu zanriah atan packaged curd pek chhuah an ni a. Mahse vanduai thlâk takin packet chu an han hawng a,changpat a lo awm tlat mai a. Mak an ti kher mai ! An zinga mi Ritesh Singh chuan Minister-te chuan IRCTC thu neitute leh Railway Minister-te chu X hmangin a hrilh ta kelh mai a. Thil thlen dan IRCTC thuneituten an chhui chian hnu chuan heng curd packet te March 9,2026 a siam niin April 7,2026-a tawp(expire)tur a lo ni. IRCTC hotute chuan thupha an chawi nain hetiang hian thil kalpui a ni ta zel a. He eitur semtu, Krishna Enterprise chu Rs 25,000 /- chawitir an ni bawk a. Thuneitute chuan fimkhur turin an zilh hau bawk a ni.Mizoramah erawh kan Thingpui dawr leh Restuarant-ahte hian tho an la inlar ang hut hut a!Tu nge kan dem dawn? Tu mawhphurhna nge!
Ka tawn hriat ve thung:
Thil dang buaipui lo nafam chu ka nitin nun hi a consumer em em ringawt mai a. Ka â fâl ta ni te hian ka hre thin.Mahse, ka kiangah mi pakhat kei aia huaisen a awm, chu pa chu Pu Rohnuna a ni. Ani hian chawimawi a phu ka ti a ni. Ani hi min nawr kaltu a ni a. Hun remchangah ka thianpa’n consumerte tana a thawh hlawk zia ka rawn ziak ang. Consumer-te harsatna ka lo buaipui ve, hlawhtlinna pahnih khat chauh ka rawn tarlang leh dawn a ni.
Tûk khat chu ka Consumer Diary bu ka han keu lêt thuak thuak a. Hetiang hian ka ziak a:
Date: 03/10/2025: Complainant:Zoremi(min lo hre thiam se) Ramhlun Sport Complex.
Complaint Case:
Fridge hman theih loh lei chungchang.
Hei hi an thu hla chu a ni. He nu tlâwm tak hian 06/01/2025 – ah chuan dawr pakhat ami Fridge a lei a. A that loh avangin vawi nga lai an inah an siamtir, a tha thei chuang lo. Sept. ni 9 – ah part an thlaksak leh a. A tha thei chuang lo. Fridge man hi Rs 59,000 /- lai a ni.
An mangan avangin min rawn pun ve chawt a nih hi! Kei chuan dawrkai, Fridge zuartute ka va biaksak a. A tawi zawngin han sawi ila, Fridge man chu an refund leh ta a ni âwm e. He Consumer-te tana chanchin tha tak hi Pi Zoremi hian tlai khaw hnuah min hrilh. Kei pawh ka lawm tlai khaw hnu a ni. A lawmpuiawm khawp mai. Ka Consumer Note buah hian consumer complaint ka dawn te hi ka registered thin a. Ka hmalak dan tlangpui ka chhi chhiah thin bawk. Mi dang ang bawka, ka lo buaipui ve thu ka lo ziak a, nih chu! Hmel inhmu lo chung pawh hian consumer tuarna hriat hi chuan thahnemngaihsak a na duh khawp mai nia!
He Consumer nu hian a thiannuin a zar a zo ve tih thu min hrilh. He nu hming erawh hi chu ka hre ta lo. Thil tha lam a ni nain an zak ve thin. Mahse…a tul chuan an hming ka tarlan pawh an hreh chuang lo. Thil leitu harsatna nei buaipui ngaite lo buaipui hi thil tha tak a ni a. Hringnun tinuamtu chu tanpui ngeite tanpui hi a ni âwm e.
Tun tuma ka sawi Consumer – te hlawhtlinna ang hi Mizoramah hian a thleng ve ta fova.A tam thei ang ber tarlan ka tum ni. Tun tum atan chuan lo tâwk tawh se. Kar lehah kan ti tiho leh dawn nia!