Consumer mi chi hrang hrangte Plus taxi pu fel leh fel lo – Lallunghnema Charity Lodge Cont: 9862288182
Chhiartute chibai ka bûk a che u.
Keini’n kan ziak ang a, nangni’n in lo chhiar ang a, kan hlâwkpui ngei bawk tur a ni. Chhiar liam puat puat lo turin kan inbeisei, mahse chhiar ngai lo ai chuan in fel ka ti tho. Consumer Right hre lo mi fel a awm theih loh, keini chuan kan ti a. Mahse, fel vang ni hauh lova, vanneih vanga thunei ta fû fû hi an awm thin tho. Chutiangin Dan hre lo Roreltu pawh an awm. MLA nazawng an fing lova, Minister na zawng an felin an fing bik chuang hek lo. Ram mipui an hmangaih nasat bik vanga Minister an ni lova. An fel bik vang a ni bik hek lo, an vannei a, an hmaah a lo chhuak ve mai a ni. Mahse, mi â nilêng ni se, hetiang hi an ni tâwp lovang a, fel lo ni se, an MLA hek lo ang. An fel a, an fing a, an taima tlangpui. Consumer Right erawh an hriat loh chuan fing tak, fel tak an ni lovang tih ka sawi ngam a ni.
tunlai hian Zebra Crossing a lar thar hle. Aizawl bâkah khawpui dangah te hian a awm ve turah ngai ila. He ZC hi ngaih pawimawh hle tur a ni. Police traffic-ho pawh hian enkawl tha se, vawng tha se, tih hi keini Consumer Activist-te duh leh beisei a ni.
Sawrkar tlâkchham fo chu ‘maintenance’ tha a ni a. thil thar siam a nalh taka chei mawia enkawl that leh si loh hi Sawrkar chhe ber zia a ni. Sawrkar kan tih hian a thawktute hi an ni. Hnathawktute an that loh chuan sawrkar tha a awm thei lo. Chutiangin Minister te hian an Party feeling phum pilin hna chu tha takin an thawk mai tur a ni. A pawimawh ber chu hna thawktu rinawm neih a ni. Consumer Protection Act 2019 pawh hi hnathawktu an that loh chuan a hlawhtling dawn lo a ni. tunah erawh thawktute an fel thaw khat, an thahnemngaihna zarah Consumer-ten khaw êng an hmu mêk.
Consumer Right Awareness programme neih reng mai tur a ni. Sawi tam ila, thawk tam bawk ila. Consumer Right sawi tam hi ei ruk leh hlemhlêtna do nâna hmanraw tha ber zinga mi a ni. Mi dang thawh atana khêk chi a ni lo. Mi tlêm têin an thawh chuan Consumer Awareness kal lai a bahlah thei a, a chak thei thin lo a ni. Consumer Awareness hi kan mamawh hle a, tute tan mah hnawl ngawt chi a ni lo.
Kan ât leh mâwl luat avanga kan pawisa(sum leh pai) hloh leh chân zo zai hi chhiar sen loh lêt tam tak a ni ngei ang. Mahse,kan rilru a na lova, hrehawm tihna châng kan hre der si lo! Bazar-ah hian bumtu leh bum fin zawh loh kan insul mai mai a ni.
Consumer pasaltha Sap thisen hrin mi thiam pahnih, Harry Gordon Selfridge leh John Wanamaker visionary American Merchant leh Entrepreneur ropui te chu thil(bungrua) man siam chhuaktu hmasa ber an nih thu kan tarlang tawh a. Anni thian dun zarah thil man te chu bituk a ni ta zel a ni.
Consumer lam zir mi leh Economist-te chuan Consumer chi hrang hrangte chu hetiang hian an lo thliar thlap mai a. Hriatna tizautu atan ka han chhawp chhuak a ni.
1. Loyal Consumer: Consumer zingah customer an nih anga dawrkai leh sumdawngte nena inkung kaihna(relationship) tha tak nei an ni a. Bungraw tha leh tlo an duh a. A man hniam leh sangah an buai ngai lova.thil hralhna man an dawn (dil) hniam ngai lo a. A man zatah an buai ngai lo a ni ber. An hawihhawm a, an khirh lova. An duh zawng a nih chuan an lei pawp zel mai thin.
2. Impulse Consumer:
Consumer zingah tum mumal nei lo, phâwk lêk hmâ mi an awm a. A rem rem lei mai mai mi, hetiang mi hi an tam ber a. An thil lei an chik ngai lo a. thil leina cash memo, receipt voucher, etc. te hi an ngaihsak ngai lo a. tul lova sum sen pawh an hreh ngai lem lo. thil zuartute tan chuan heng ho hnen a thil hralh hi a nuam bik hle a ni. Hengho hi Impulse Consumer tih an ni.
3. Distant Consumer:
Hengho hi burgain hunter an ti bawk. thil man a sang emaw a to emaw a man ngaiin thil an lei hreh tlat thin a. A man nawr hniam chu an hna pui ber a ni bawk.
4. Need based Consumer:
Mamawh mil zela bazar thin an ni. Anni ang hi Smart Consumer an tih ang hi a ni ber ang chu. Henga Consumer-te hi an hnawk lova, an lei tur, mamawh an hre chiang a. Pawisa pawh an heh lo a ni. An thil leiah an uluk a, an fimkhur a. Bungrua hman tlak lo an lei ngai lo.
5. Wandering Consumer:
Hetiang Consumer hi an tam khawp mai! Bazara kal, lei tum mumal(clean purchase intent) nei lo an ni a. Website hmangin thil thar an en kual mai mai thin a. He Groupa mi te hi Consumer tha lo tak an ni âwm e. Eng ang consumer nge i nih ve le?
thil hralhtu(seller)-te ringawt hi kan chuk kan chuk a. Keini thil leitu(buyer) leh service leitute hi kan inenfiah a tul hle a ni. Consumer rinawm lo, Consumer chapo leh hawihhâwm lo kan awm teuh ngei ang. Dawrkaite rinawm leh dik tura kan beisei mek lai hian Consumer-te pawh hi kan rinawmin kan dik ve ngei tur a ni.
Hmanni lawk khan taxi pu fel tak ka tawng a. An rate aia sang a passenger a phurh ngai loh thu leh a inthlahrun thin thu min hrilh mawh mawlh a ni. Amah chu Pu Nunga a ni.
Kum sawm liam ta vel khan taxi pu tha lo tak hian fare sang tak min dil a. Ka hnial a, a titau a, chuan man (fare) pek ka tum laiin a tlan tau ta daih mai! A pawisa tur chu a chân ta hlauh zawk a ni.
Keini Consumer dikte hian taxi pu Nungate ang hi ka ngaisang a ni.
tun hnaiah Consumer pahnih tanpui an ni.
Pakhat chuan pheikhawk a lei a. A chah ang a nih loh avangin refund tihsak a ni.
Mi pakhat chu Cement cheng nuai 2 chuang man refund tihfelsak a ni bawk. An lawm hle a, Consumer Activist-te pawh an lawm a ni!
Chawlhkâr lehah kan ti ti ho leh dawn nia.
Ni tha in tan!