Copa del Rey semi lut Barca

Nilaini zanah Ous-mane Dembele goal khat tihluh hmanga an mikhual Real Sociedad hnehin Barcelona chuan Spanish Copa del Rey semi-final an lut.

Sociedad hi inelna hrang hranga an game khelh hnuhnung vawi-kuaa chak vek lai niin, Nou Camp-ah pawh inrintawkna thuk tak nen bul an tan a, first half-ah an lama goal lut tur dang tluan thei bawk mah se chawlhlawk dawn mi-nute 40-ah Sergio Bus-quets laka a chet dan hlauhawm avangin an player Brais Mendez hnawhchhuah a ni a, chu chu tuarin second half tir lam minute 52-ah an tlawmna goal ni zui ta an chhuah a, semi-final an lut zo ta lo.

Dembele chuan ding lam sira Jules Kounde ball pek umlutin chep tak karah chakna goal awmchhun a khung a; Gavi chuan chiang lehzuala Barcelona chakna goal thun theihna hun remchang nei mah se goal kham a tihper.

Quarter-final inkhel dangah Osasuna pawh-in hnehna changin last four an lut a, extra time-ah 2-1-in an tumpui Sevilla an hneh.

Ezequiel Avila chuan hun pangngaia mualneitu team chakna ni thei tura ngaih a thun zet a, hun pekbelh minute 94-ah Youssef En-Nesyri chuan Sevilla siphurh sutna goal a tilut a; extra time first half-ah on-loan Barcelona winger Abde Ezzalzouli chuan Osasuna tlangna goal hlu bik a thun.