Copa Delrey-ah Barcelona an champion

Inrinni zan khan Spanish Copa del Rey final khelh a ni a. Sevilla muala inkhel hmuhnawm takah FC Barcelona chuan an elpui lian Real Madrid chu 3-2 in an hneh a, ropui takin an champion.
Copa del Rey final-ah team lian pahnih; Barcelona leh Real Madrid te intum hian ngaihven a hlawh a, inkhel entu pawh an thahnem hle. Dream final a nih ang ngeiin beisei lawk dan chiahin a hmuhnawm a. Goal nga ngawt luhna inkhel a nih bakah red card hmu pathum ngawt an awm bawk vangin final ropui danglam bik a ni. Final ropui takah hian Jules Koundé goal thun hmangin Barcelona in hnehna hlu tak an chang.
Final-ah hian champion tura rinkai FC Barcelona in bul an tan tha a, Pedri chuan minute 28-naah Lamine Yamal siamsak atangin hmahruaina goal a thun. Pedri goal thun hmang hian hun rei tak chhung hma an hruai a. Goal an chhuah hnuin Real Madrid in an khingpuite an nawr zui thuai a, penalty an hlawhchhuak teuh hle. Penalty hlawhchhuah ngei turah inngai mah se Los Blancos hi penalty pek an ni ta lo thung.
Inkhel hmuhnawm takah goal a luh belh theih loh reng hnuin hun tawp dawn hnaih lamah goal thum ngawt hmuh tur a awm a, inkhel a hmuhnawm leh zual. Real Madrid tan hian bench atanga lut Kylian Mbappé chuan minute 70-naah free-kick a chhuih goal a. Freekick a pet goal vawi khatna hmangin Mbappe hian an si phurh a sut. Mbappe goal thun vangin Real Madrid an phur thar a, goal an thun belh leh thuai. Arda Guler corner chhuih tha tak chu Aurélien Tchouaméni chuan fuh zetin a tauh goal a, minute 77-naah hma an hruai letna goal a thun.
Hnufual zawk an nih hnuin Barcelona in goal thun tumin tan an khawh nasa lehzual a, goal pawh an thun leh thuai. Yamal long pass atangin Ferran Torres chuan goal a thun a, minute 84-naah an si phurh a sut. An si phurh an sut hnuin Catalan club lian Barca an khel tha chhunzawm a, hun tawp dawn tepah penalty an hmu. Minute li chhung zet VAR rawn a nih hnuin Raphinha hlawhchhuah penalty hi hnawl a ni a, Real Madrid an him. Barca in penalty an beisei thlawn hnuin goal dang a luh belh thei tawh lova, hun pangngaiah chak zawk an awm thei lo.
Hun pangngaiah chak zawk an awm theih loh vangin exratime khelh chhunzawm a ni. Extratime-ah pawh goal a lut thei lawk lo. Hun tawp dawn hnaih lamah Luka Mudric ball pek fuh tawk loh vangin Barca defender Jules Koundé chuan goal thuntheihna hun tha a nei. Kounde hian lei hrulah fuh zetin a pet goal a, minute 116-naah chakna goal a thun. Kounde goal thun hnu hian goal dang a luh belh thei tawh lo. An si phurh sut tuma tan khawh vanglai takin Real Madrid player te referee thutluknaah an lawm lo hle. An chet dan mawi lo vangin Antonio Rüdiger, Lucas Vázquez leh Jude Bellingham te hnawhchhuah a ni. Goal dang a luh belh theih tawh loh vangin Barca in Real Madrid lakah hnehna hlu tak an chang a, Copa del Rey-ah a vawi 32 nan an champion a, champion ngun ber an nihna an tihzau belh. Barcelona hi Copa del Rey-ah vawi 32 an champion tawh laiin Real Madrid erawh chu vawi 20 chiah an la champion.
Hansi Flick-an a enkawl hnuin Barcelona hian an hmelma lian Real Madrid a ngam hle a, vawi thum an hmachhawn tawhah an la hneh vek. Barca hian season kal meka Real Madrid an hmachhawn pathum; La Liga, Spanish Super Cup leh Copa del Rey final-ah te a hneh vek a. La Liga-ah pawh Real Madrid chungah an awm mek a, an hmelma lian laka an hmahruaina humhim a, champion ngei tumin tan an khawh zui ang. Catalan club lian FC Barcelona hian champions league semi-final-ah Inter Milan an hmachhawn zui leh dawn a, UCL leh La Liga-ah an champion zui leh thei a nih chuan trible champion ni chungin season an khar ang.
Copa dey Rey final khelh hma atangin Real Madrid hian a chhe lamin boruak lian tak an nei. Final-ah VAR vil tura ruat zingah duh loh an nei a, thuneitute hnenah thlak tura an ngenna in awmzia a awm lo. Heti a nih vang hian final hmachhawn loh maite an rilruk hman rum rum a. Phur lo tak chungin final an hmachhawn naa an hmelma lian ber lakah an tlawm zui leh kher bawk. La Liga-ah Barcelona lehpela an champion hlauh a nih loh chuan team lian Real Madrid hian kut bengin season an khar a ngai dawn. Trophy an lak theih awm chhun La Liga-ah tan an khawh zui hle ngei ang.