Corporate hnuaia P&E dah thuai turin lo ngen

On Apr 5, 2025 17 0

Corporate hnuaia P&E dah thuai turin lo ngen
Mizoram Power & Electricity department chu corporatise thuai turin central Power ministry secretary chuan Power minister an ngen
New Delhi-a cham mek Mizoram Power minister F Rodingliana chuan Ningani khan Union Power secretary Pankaj Agarwal a hmu a. Tuirini Hydel Project tihhlawhtling tura Power ministry-in a puihnaah lawmthu hrilhin, reilotea DPR peihfel tur Tuivai leh Tlawng Hydel Project chu funding hmuh kawngah pui leh turin a ngen.
Power secretary hian sawrkar laipuiin hmarchhak huamchhunga tui tha chakna hmanga kawlphetha (hydro power) tam zawk siamna atana scheme a duan ‘Scheme for Central Financial Assistance for Development of Hydro Power in the North Eastern Region’ Mizoramin a chhawr tangkai theihnan a thawhpui tur central PSU tha leh rintlak a zawnpui tur thu sawiin, biak tur tulte a be kual nghal a. Mizorama RDSS hnathawh mek, loss reduction work leh smart metering project chu chak zawka thawk zel tura lo ngenin, central ministry puih a ngaihnaah hriattir zel turin a ngen.
P&E department corporatize tura hma lak mek chu a ranglama puitlin turin a lo ngen bawk a. 10% GBS atanga Mizorama transmission line tihchangtlunna tur cheng vaibelchhe 305.09 a hmuh tur pawh reilotea pekchhuah theih a nih tur thu a lo hrilh.
Power minister hian Power Finance Corporation (PFC) hotute chu a thutkhawm pui a. Tuivai Hydel Project siam tum chu PFC kaltlanga funding sawipuiin, DPR peihfel a nih atanga thla khat chhunga an tihfel theih tur thu PFC lam hian an hrilh.
Mizorama RDSS hnuaia loss reduction work leh smart meter vuah hna thawktu SGIL hotute a thukhawmpui bawk a. Chak zawka hnathawh dan tur an ruahman.
SJVN hotute nen indawrin Darzolui Pump Storage siam ruala NTPC (National Thermal Power Corporation) in a lo hlamchhiah tawh, megawatt 450 tharchhuak thei Kolodyne Hydel Project siam hna thawh a nih theih dan tur chu F Rodingliana hian a sawipui a. Mizoram sawrkar leh SJVN-in joint venture-a Kolodyne HP siam hna thawh dan tur ruahman a ni. SJVN hian central PSU an nih anga Central Financial Assistance Scheme chhawr tangkaia hma lak an duh tih minister hnenah hian an thlen a ni.