Corruption-a fihlim tura insawiten corruption-a thubuai nei CEM tir – Lal Thanzara

Corruption-a fihlim tura insawiten
corruption-a thubuai nei CEM tir
– Lal Thanzara
Lai Autonomous District Council-a ZPM sawrkar pian danah corruption-a fihlim tura insawiten corruption-a thubuai nei mek chief executive member-ah an tungding leh tih Congress hruaitu Lal Thanzara chuan a sawi.
Zirtawpnia Congress Bhavan-a inkhawmah MPCC president Lal Thanzara chuan, tuna chief minister ni ta Pu Lalduhoma hian Lawngtlaia thu a sawinaah District Council chu ‘musical chair’ ang maia Aizawl atanga duh duha an dah chu tha an ti ve loa, ZPM a sawrkar chuan an ti ve dawn lo, tia a sawi thu sawichhawngin, tunah lem CEM atana ZPM-in an sawm tak chu, corruption case-a court-in thiam loh a chantir, ZPM Thalai pawhin thuchhuah siama CEM ni zel tlaka an ngaih loh thu press release an lo chhuah khum tawh a ni tih a sawi.
“Musical chair ang maia Aizawl atanga sawinghin kan tum lo, titu khan inlarna a hmu nge kan hre lo, thil ri ret ret a awm ta a, Congress CEM ni mekin Aizawlah Pu Lalduhoma ngei a rawn hmu a. Pu Duhoma chuan, nangni hian min rawn zawm duh si loa, option dang kan nei hleinem, a lo ti a. Autonomous Council rorelna kan sawisa kan sawisa dawn lo titu leh ZPM Thalai-in CEM ni tlaka an ngaih loh chu chief minister chuan LADC-ah CEM ni turin a duh ta a ni,” a ti.
ZPM Val Upa Council-in CM, minister, MLA emaw corruption-a inhnamhnawihte ban theihna power an neih chu hlihsak an ni ta em ni, tia zawtin, corruption thubuai neia court-in a convict, mahse High Court-a a appeal mek avanga la fihlim mai mai chu CEM-ah an dah ta tih Lal Thanzara hian sawiin, “Kan sawrkar hrawn mek hian awmdan tur anga an insawi angin an awm loa. Hetiang chung hi chuan kan ramah Pathian ram min thlensak ka ring lo,” a ti.
Tun LC/VC inthlan result-ah Congress party chauhin hlimna tur a nei tih MPCC hruaitu hian a sawi a. ZPM-in inthlan hun pangngai August-a inthlan chuan an chhiat lutuk an hlauh avangin term pawt tawi mah se, an beisei ang a ni loa, an tan a lawmawm viau loh ang tih a sawi. MNF-in fund nen campaign an bei tih sawi bawkin, ZPM party anga sawrkarna chang hlim sia LC/VC a sawrkarna nei tlem an la awm lo tih a sawi.
Congress sawrkar siam tirh, kum 2009 khan VC inthlanah VC 444 (80%) a la a, MNF sawrkar siam tirh kum 2020-a VC inthlanah MNF hian VC 327 (58.60%) niin, ZPM sawrkar siam hnu lawk, 2025 VC inthlanah ZPM hian VC 266 (48.98%) ah chauh hnehna a chang tih a sawi. 2020 LC inthlanah MNF-in LC 71 changin Congress-in 5, ZPM-in 2 a chang a, tun 2025 LC inthlanah Aizawlah Congress chuan LC 8 an nei ta tih a sawi. “Kum khat lek chhungin ZPM sawrkar lakah mipui rinna a tlakhniam chak zia a tarlang,” a ti.