MZP-in kawngpui siam mek tlawh
Mizo Zirlai Pawl chuan Mizoram ei leh bar lakluhna kawngpui Vairengte leh a chhak lam kawng siam mek chu a hmunah an tlawh a. Fur thlen hma ngeia zawh hman tum turin an ngen.
National Highways Infrastructure Development Corporation Limited (NHIDCL) hnuaia hna thawh tam tak chu a nih dan tur a nih loh avanga sawiselna awm thin sutkian a nih theihnan, MZP rorelna sang ber Assembly vawi 68-na kum 2024-a neihah hma lak nise, tiin an lo rel tawh a. Hei hi MZP Gen. Hqrs. chuan a bawhzui a ni.
MZP chuan kumin January 30 khan NHIDCL Regional Office Aizawl executive director Virendra Kumar Jakhar hmu in, Mizorama an hna chungchang an sawipui a. Ningani khan Vairengte leh Bilkhawthlir inkar hna thawh mek tlawhin, hnathawhna hmun dang pawh a tul anga tlawh zel an tum tih an sawi.
MZP Gen. Hqrs chuan MZP Hqrs leh Branch pawhin, anmahni huamchhungah heng hna thawh hrang hrang hi theih ang angin endik zel turin an inchah tih a sawi a. Hna chhia leh a nih dan tur ang ni loa hnathawh a awm chuan, a tul angin hma lak zel an tum tih a sawi a ni.
Vairengte atanga Bilkhawthlir inkar hi NHIDCL hnuaiah Balaji Construction Company kut a ni a, km.10 a thui kut an thlak tawh tih company engineer-te chuan MZP hruaitute an lo hrilh. Fur pui thlen hmaa zawh hman ngei an tum tih an sawi bawk.
MZP-in kawngpui siam mek tlawh
Get real time updates directly on you device, subscribe now.