March 12-ah CADC VC inthlan
Chakma Autonomous District Council huamchhunga village council inthlanpui chu kumin March 12 hian neih a ni dawn.
CADC hnuaia VC inthlan hun tur hi February 14 khan State Election Commission Mizoram chuan a puang a. Chuh tumte tana hming pek luh theih hun tawp ni chu February 19 chawhnu dar 3.00 thleng a ni. February 21-ah nomination paper endik a ni anga, inhnukdawk duh tan February 24 thleng hun hawn a ni.
March 12 zing dar 7.00 atanga tlai dar 4.00 inkar chhungin vote thlak a ni anga, vote hi inthlan zawh rualin polling station tina chhiar nghal turin SEC chuan a ruahman. Inthlan kaihhnawih zawng zawng hi March 18-ah chuan zo fel vek turin a ti bawk.
Inthlan hun puan a nih tak avangin CADC huamchhungah model code of conduct hman tan nghal a ni ang.
Chakma Autonomous District Council-ah hian VC 88 a awm a, hemi huamchhungah hian chhungkaw 16991 an awm. Vote nei mipa 19162 leh hmeichhia 18721, a vaiin voter 37883 an awm a; VC seat 516 a awm a ni.
SEC hotute sawi danin, Autonomous District Council hian a hranin VC dan an nei a, chumi ang chuan VC tinah hmeichhe tana seat hauh bik seat khat zel a awm. VC member tamna leh tlemnaah pawh reserved seat hi pakhat theuh a ni.
Mizoram district 9-a LC leh VC inthlan neih zawh taka, vote tla chhiar hun inang, zan dar 7.00 a kalpui ang kha tun tum CADC ah hian kalpui leh a ni maithei tih SEC hotute chuan an sawi a. Ruahmanna thar siamna hun ala awm tih an sawi.
March 12-ah CADC VC inthlan
Get real time updates directly on you device, subscribe now.