Court-in Delhi-a Dipke-a punkhawm huaihawt tum phalsak

Court-in Delhi-a Dipke-a punkhawm huaihawt tum phalsak
Delhi High Court chuan Cockroach Janta Party (CJP) leh an pawl dintu, Abhijeet Dipke-a’n Zirtawpnia Connaught Place, Delhi-a punkhawm a huaihawt tur dan tumna a hnawl a, Dipke-a chuan a tam thei ang ber kalkhawm turin a sawm zui.
Court chuan Delhi Police-te hnenah boruak thunun turin ‘a tul ang apiang ruahmanna siam turin’ a ti.
Court hian Palika Bazar-a sumdawng, Anil Kumar Gupta-a’n Central Park, Connaught Place-a pun khawm huaihawt chuan an sumdawnna leh helai vela mite tan harsatna siamin a tibuai dawn nia thlenin Dikpe-a thil tum hi dang turin court-ah a ngen a, hei hi Ningani khan ngaihtuah a ni tih Bar & Bench chuan a tar lang.
Delhi Police hnenah petition thehluttuin a hlauhthawn ang thil chu a thlen lohna turin ruahmanna siam turin a ti a. Hemi chungchang hi a tul a nih chuan November 3-a ngaihtuah leh turin a ti a ni.
Dipke-a hian ram pum awh, ‘Lehra Do Tiranga’ tia hming vuaha thil phut lantirna huaihawt hi buatsaih a tum a, tlai dar 5:00-ah Central Park, Connaught Place-ah hnam puanzar nena kalkhawm turin mipuite a sawm a. Hun an hman tur hi an CJP member pahnih, Saurav Das-a leh Ashutosh Ranka-a te man duh lohna a nih thu a sawi.
Dipke-a hian hnam puanzar vau chu dan bawhchhiatna a nih loh thu sawiin khawpui dangah pawh mipuite chu an punkhawm ang hi huaihawt ve turin a sawm a. A hma khan he pun khawm a koh avang hian man pawh a tawk mai thei tih a lo sawi tawh.
Hetianga lungawi lohna lantir tum a ni hi Das-a leh Ranka te Tihar Jail-a ni nga chhung dah tura thawn an nih hnu lawkah a ni a. CJP activist Ajinkya Shinde-a telin tun hnaia Delhi Police-in lungawi loh lantirna hmun atana an phal loh, Jantar Mantar-a an kal luih avanga man an ni.
CJP member-te hi Chief Election Commissioner (CEC) Gyanesh Kumar-a bâng tura an duhna an aupui nia puh an ni a. Police chuan phal lohna hmuna kal, vantlang thupek zawm lo leh vantlang himna tiderthawng theia puihin an man a ni.
Central Park-a Zirtawpnia Dipke-a’n punkhawm a huaihawt tur kaltlangtir lo tura ngennaah hian he hmun hi lungawi loh lantirna hmun atana ruahman a ni lo va, veivah a tibuai dawn a, sakhaw hunpui dawn laiin Connaught Place-a vantlang chet velna leh sumdawnna a tibuai thei dawn nia thlen a ni.
Delhi Police hian a hmain Jantar Mantar chu punkhawm huaihawtna hmun atana ruatna phelhin a aiah hmun pathum – Ramlila Maidan, Burari Ground leh CBD Ground te chu an ruahman tawh a ni.
Dipke-a’n Zirtawpnia pun khawm a huaihawt hi Delhi leh khawpui lian danga Kumar-a’n electoral roll Special Intensive Revision (SIR) kalpuiah dik lo taka thil tia puha bâng tura nawrna kal zel a ni.
Election Commission of India (ECI) chuan SIR hi rorel lai, BJP-in an hlawkpui theih turin a ti niin an puh a. He inpuhna hi Indian Express chanchinbuin a chhuinaah Election Commissioner Sukhbir Singh Sandhu-a leh Vivek Joshi-a ten SIR kaihhnawiahh hian CEC hi vawi tam an hnial nia a tar lan atanga darh a ni a. ECI-a hotu pathumte hi an inlungrual lo nia a lan tak avanga puak chhuak a ni.
He thil avang hian eptu party, CJP leh All India Students’ Association (AISA) bakah activist leh lo neitu pawl tam tak inko khawmin lungawi lohna an lantir zui ta a ni.
October 10 khan AISA National President Neha Bora-i chu Jantar Mantar-a kal an tum an dan hnuah INA Market bulah Dilli Haat a pan laiin man a ni.
Eptu hruaitu langsar leh activist dang tam tak pawh CEC laka lungawi lohna lantirnaah hian man an ni a. An zingah hian West Bengal chief minister hlui Mamata Banerjee, Delhi chief minister hlui Arvind Kejriwal, Kerala chief minister hlui Pinarayi Vijayan, CPI(ML) Liberation General Secretary Dipankar Bhattacharya, advocate Prashant Bhushan leh activist Yogendra Yadav te pawh an tel.
YouTuber Dhruv Rathee-a pawh a in atanga lak a ni a, CJP hruaitu zingah Dipke, Das leh Ranka te pawh Delhi-a October 10-a an tum chiah lo hren zui an ni bawk.
Lungawi lohna lantirtu mi sang tel leh chanchinbu mite pawh Delhi hmun hrang hrang atangin police hian an man a ni.