Covid len laia sum dawn hman dan puangzar turin sawrkar phut

Covid len laia sum dawn hman
dan puangzar turin sawrkar phut
Congress Thalai chuan chief minister Zoramthanga hnenah lehkha thehlutin Covid hrilen laia sawrkarin sum a dawn leh chu’ng sum a hman dan mipui hmaa puangzar turte, Kolkata Ballygunge Mizoram House hralh tum chungchang leh Manipur atanga raltlante chhawmdawl tura Mizoram sawrkar phutna a ni.
Covid len laiin thil tul leh sum sen ngai zawng zawng kohhran leh khawtlangin a tum deuh vek bakah sawrkar laipui atanga Covid pual sum lokal, kohhran, mimal leh pawl hrang hrang atanga Covid puala CM Relief Fund-a sum lut tam tak chu thildangah hman ni lo se an duh tih an thlen a. Centre atangin Covid tanpuina sum tum riat, belhkhawmin Rs. 79,62, 88,000 leh CM Relief Fund-ah Rs. 26,79, 80,470 hmanna tur dik taka hman nise, kha ai khan kan tuar na lo ang tih an ring tih sawiin, ‘Heng sum hi hman lohin a la awm a ni loh chuan mipui hnena a hmanna puangzar turin kan ngen,’ a ti.
Congress Thalai Hqrs chuan Kolkata Ballygunge-a Mizoram House chu tihral tum a ni tih leh e-tender hmanga hralh tum a ni tih an hriat thu sawiin, tih ral tum hi tha an ti lo chungin an do ngawr ngawr loa, tihral a nih hma in hralh a ngaih lohna’na tih theih awm ang angte tih hmasak phawt nise an duh tih a sawi.
‘Kolkata Municipal Corporation hnuaia building regulation (G-3) hi inngaihnathiamna awm thei lo tawp a nih kan ring loa, Salt Lake-a Mizoram House sak a nih dawn pawh khan tuna sak a nih ang thlap khuan sak phal a ni loa, mahse, khatih laia chief minister Pu Lal Thanhawla khan hriatthiamna dilin tuna an sak ang khuan sak an phalsak ta a ni,’ an ti a. State pakhat dilna chu an zahsak em em ang tih an rin thu leh chhuanlam dangte pawh, hei leh chen mikhual an lo lawilut tawh a, harsatna liantham an tawh a la awm lem lo nia hria in, chhuanlam mai mai ni ah an ngai tih a sawi.
Kum 2019-a sakthat lehna tur ruahmanna leh phalna pawh a awm hma hauha a in thiah a ni chu tu emaw hlawkna tur niawm taka lang theia engmah tihfel a nih hma leh luah tlak a la nih reng laia thiah a ni chu pawi an tih thu a sawi a. Mizoram House dang pahniha indaih lohna chu sak that phalna pawh la hmasa lo leh thil tul tifel hmasa loa Ballygunge Mizoram House thiah a nih ngawt chhan chu an zawt tih an sawi a ni.