Chinese city Wuhan-a kum thum chuang kaltaa Covid-19 hmuhchhuah a nih atangin tun thlengin virus intan dan chu thil mak leh hriatfiah theih lohin a la awm reng.
28 February 2023 khan a hmaa conspiracy theory anga hnawla lo awm tawh pandemic chu Chinese laboratory atanga putru a ni tih chu FBI Director Christopher Wray thusawi atanga irhchhuak lehin FBI te chuan Covid-19 chu ‘Chinese sorkar thunun laboratory’ atang ngeia putchhuak nia an ngaih thu an sawi leh chuan boruak a siam leh hat a.
Hei hi pandemic virus intan dana FBI classified judgement siam mipui nawlpui hriata sawichhuahna hmasa ber a ni a.
Beijing chuan na taka chhang let nghalin Washington chu ‘political manipulation’ kalpuiah a puh zui nghal thung.
Covid-19 bulthut chungchangah theory hrang hrang a awm a, tun thlengin inhnialna hrang hrang a la awm a, chungte chuan pawimawhna a nei vek bawk.
-- Advertisement --
Eng nge lab-leak theory?
Coronavirus chu tihpalh thilin central Chinese city Wuhan-a laboratory atangin a putru nia ngaihna a awm a, rinhlelh a ni bawk a, Wuhan hi Covid-19 hmuhchhuahna hmasa ber a ni.
He theory ringtute chuan Wuhan a biological research facility chu an kawh rawn a, Wuhan Institute of Virology (WIV) chuan coronavorus chu bak-ah kum sawm chuang tehmeuh an zirchiang tawh tlat a ni.
Institute of Virology hi Covid-19 chhuahna bul ber nia ngaih Wuhan a Huanan wet market atanga minute 40 lek kala hnaia awm a ni.
He theory ringtute chuan virus chu WIV lab atanga putruin a bul hnai wet market-ah chuan a darh niin an ngai a. A tam ber te chuan virus chu siamchawp (engineered) ni lovin wild atanga a nihna ang anga lak putru niin an ngai bawk.
Pandemic len tirh lai khan he theory hi a lar hle a, khatih lai US President Donald Trump pawh kha he theory ringtu zinga tel a ni a, thenkhatte phei chuan virus chu biological weapon a hman theih tura siam danglam an ti bawk.
Mahse media leh politics-a mi tam tak te chuan khatih lai khan he theory hi an hnawl a, a thente chuan thil ni theiah an ngai tho bawk a. Scientists te pawhin a finfiahna awm lo an ti bawk.
US intelligence report classified chuan Wuhan lab-ah hian researcher pathumte chu November 2019 khan, Covid-19 mihring tena Wuhan-a an kaidarh hmain an kai tawh a damdawi Inah enkawlin an awm tawh tiin an sawi.
US chuan a chhui zui a, mahse, Biden administration chuan state department Trump-an Lab-leak theory chhui chiang tura a tih te chu an titawp zui tia sawi a ni a.
“Lab-leak theory hi dik thei a ni a, a ni ngei em tih finfiah tuma chhui chian hi kei chuan tulah ka ngai” tiin Anthony Fauci, President Biden a chief medical adviser chuan May 2021 khan US Senate committee hearing neihnaah a sawi.
Kum 2020-a thuneihna a chan tirh khan President Biden chuan ‘origin of Covid-19’ report a ngen a, mihringa inkaichhawn hmasak ber a ni nge, ransa atangin mihringah nge laboratory atanga tihpalh thila inkaichhawn tih report pek a ngiat a ni. Hei vang hian May 2021 khan Biden chuan intelligence official te chuan a leta nasa a hripui chhuah dan chhuina chu tichak turin thupek a pe zui bawk.
Scientists te ngaihdan?
Tun thlengin inhnialna nasa tak la kalpui mek reng a ni a. World Health Organiszation (WHO) investigation chu tichiang ber tura ngaih an nih laiin mithiamte chuan WHO hmalaknaah chhanna aiin zawhna an ngah zawk thung.
Kum 2021 tir lam khan WHO ruat scientists rual te chuan Wuhan an pan a, an tum ber chu pandemic source hriatchian a ni. Ni 12 chhung hun an hmang a, laboratory te an tlawh hnuah WHO team te chuan lab-leak theory chu ‘thil awm ang lo’ tiin thutlukna an siam.
Mahse, scientists tam tak te chuan WHO team te thutluknaah zawhna an ngah hle thung. Group of scientists intelkhawm te chuan WHO report chuan lab-leak thoery a la thutak tawk lo tia sawiin an report phek za eng emaw zah chu an hnawl thu an sawi bawk a.
“Natural emaw laboratory atanga chhuak a ni em tih ngaihdan hi data mamawh tawk kan neih theih hma chuan kan ngai thutak em em ve ve tur a ni” tiin scientists rual te chuan Science Magazine-ah an ziak zui a.
Heng mithiamte hi laboratory atanga putru tia ngaihdan ngunthluk zawka chhui chian duhtute an ni a. He mi hnu hian WHO director-general ngei Dr tedros Adhanom Ghebreyesus pawhin chhuichianna thar kalpui a ngai tia sawiin, “Ni thei awm anga langte zirchian zui zel turin kan inhawng a ni,” a ti nghe nghe.
Kum 2021 khan Dr Fauci pawhin virus chu naturally a insiam nia a ngaih theih loh thu a sawi zui bawk a. A hma kumah erawh Dr. Fauci ngei hian Covid chu ransa atanga mihringa inkaichhawn nia a ngaih thu a sawi a, a ngaihsan a sawhsawn zui a ni.
China-in eng nge a sawi?
China chuan laboratory atanga virus putru nia ngaihna chu intihhmingchhiat tumna tiin a sawi thung a. China State media te chuan US sorkar leh Western ram te chu pandemic bultanna chungchangah dawt thu thehdarhah a puh bawk.
Wray thusawi pawh chhang letin China foreign ministry thupiuangtu chuan US intelligence agencies te chu virus origin chhuina kawng chu politics hawi zawnga kalpui vakah a puh bawk a.
US intelligence community te hian ‘dik lo tak thiltih’ leh ‘inbumna’ an kalpui fo tih history atangin a lang fiah em em, tiin Mao Ning chuan a sawi a. Hei vang hian Covid-19 origin chungchanga ngaihdan an sawi pawhin belhtlakna a nei lo a ti bawk.
China chuan thoery hran neiin coronavirus chuan Wuhan chu China ram chhung hmun dang emaw South-East Asia ram atanga frozen meat phurhluh atangin a lut a ni a ti ve thung. Chumi tichiang tur chuan China sorkar chuan an researcher pakhatin bak atanga sample a lakchhuaha a zirchianna chu behchhanah a hman thu a sawi a.
Prof Shi Zhengli chu ‘China Batwoman’ tia hriat lar niin Wuhan Institute a researcher a ni bawk a, kum 2021 a report a siamah amah leh a team te chuan kum 2015 daih tawh khan China a mine ah bak an zirchiannaah coronavirus strain chi hrang hrang pariat lai pai an hmuchhuah thu tarlan a ni a. Paper chuan Pangolins a coronavirus hmuh te chu mihring hriselna atan pawi thei ber tiin an sawi bawk.
Hei bakah hian Chinese propagandistss te chuan conspiracy theory dang an vawr ve nasa bawk a, chung zinga pakhat chu 1 March 2023 khan China foreign ministry in sawifiahna an neihah Mao Ning chuan coronavirus chu Washington DC atanga 80km vela hla Frederick, Maryland a Fort Detrick atanga putru a ni zawk em tiin zawhna a siam zui a ni.
Fort Detrick hi US biological weapons programme centre ni thin niin tunah pawh biomedical labs Ebola leh smallpox ang te chhui chianna la kalpui mek reng a ni.
Theory dang awm em?
Theory dang awm chu ‘natural origin’ theory a ni. He theory hmang hi chuan virus chu ransa atangin scientists emaw laboratory te inrawlhna tel hauh lovin mihringah inkaichhawn a ni tih a ni.
Natural origin theory thlawp tute chuan Covid-19 chu bak atangin mihringah emaw ransa dang he virus lo kawl reng tu ‘intermediary host’ atangin mihringah inkaichhawn tiin an ngai.
He ngaihdan hi WHO pawhin a thlawp a ni a, WHO report chuan Covid chu intermediate host kaltlangin mihringah inkaichhawn a ni an ti.
He ngaihdan hi pandemic len tirh lai kha chuan a nawlpui tena an pawm a ni a, mahse, hun a kal zel a, scientists te chuan Covid-19 genetic nei bak emaw ransa dang emaw hmuh chhuah emaw hriatfiah an nei thei miah si lo chuan rinhlelhna a siam ta a ni.
Chutih rual chuan FBI Director Wray-an an ngaihdan a sawi hnuah pawh he virus zirchiang tu scientist tam tak te chuan lab leak atanga putru a nih theihnan scientific evidence a la awm chuang lo an ti tho thung.
Chuvang chuan natural origin chu theory awm ang ber a la ni lo thei lo, tiin Professor David Robertson, head of viral genomics and bioinformatics, University of Glasgow chuan a sawi a.
Prof Alice Hughes, University of Hong Kong pawhin US Department of Energy ten virus chu Wuhan a lab atanga putru an tih chu finfiahna thar hmuhchhuah behchhan emaw a ni chuang lo va, hei vang hian virus chhuah theihna pahnih awm theiah a awihawm loh zawk a la ni tho tiin a sawi.
Eng nge a pawimawhna?
Covid-19 chuan khawvel a chawkbuai hneh hle a, nunna chan khawvel pumah maktaduai 6.9 chuang an awm tawh a, scientists tam ber te chuan hun lo la kal zel turah hetiang anga nunna channa ven a nih theih nan virus chhuahna dik tak hriat chu tihmakmawhah an ngai a ni.
Tuna ‘zoonotic’ theory hi a dik a nih chuan farming leh wildlife exploration lama activity te chu a nghawng ngei dawn a. Denmark chuan mink hmanga virus inkaichhawn hlauhna avangin mink maktaduai chuang tihhlumin an awm phah tawh a ti a.
Chutih rualin laboratory leak emaw frozen food chain atanga virus chu chhuak leh inkaichhawn a ni tih finfiah a nih ngat chuan scientific research leh international trade te a khawih danglam ngei ngei dawn bawk.
Laboratory leak theory chu a dik a lo nih ngat chuan khawvelin China a ngaihdan a danglam kumkhua tawh dawn bawk a. China chu pandemic lentirha information pawimawh te thup tlata puh niin hei vang hian US-China inkar pawhin a tawrh phah a ni.
“A ni khatna atang phatin China hian nasa takin a thup a ni,” tiin Jamie Metzl, Washington-based Atlantic Council, lab-leak theory ngunthluk zawka chhui chian ngiat tu chuan a sawi a. “Virus origin hi a awm leh nih theih dan kawng tinrenga finfiah tuma kan chhui chian a ngai a ni,” tiin a sawi.
A thente erawhin fimkhur taka kal thlangin, China dem hma lutuk pawh an duh lo thung a. “Dawhtheihna kan neih a ngai a, kan diplomatic pawh a ngai. China thlawpna tel lo chuan engmah tih theih kan nei lo. Tumah indem lova thil kalpui a ngai,” tiin Prof Dale Fisher, Singapore National University Hospital-a thawk chuan a sawi ve thung.