Covid vanga VC term pawhsei kha siamrem tumin ruahman a ni – LAD minister

Covid vanga VC term pawhsei
kha siamrem tumin ruahman a ni
– LAD minister
Kum 2020-a Covid 19 leng avanga village council term pawhsei kha tunah hrileng a reh tak avangin VC inthlan hun siamrem turin sawrkarin ruahmanna a siam ta tih Local Administration minister C Lalsawivunga chuan a sawi.
Thawhtannia ZPM office-a inkhawmah minister C Lalsawivunga chuan Mizoram sawrkarin VC term a pawh tawi chhan chu fimkhur tak leh daihzai taka state sum hman a duh vang a ni, tiin, Covid leng vanga VC term pawhsei tak herremna tur a ni tih a sawi.
LAD minister sawi danin, 15th Finance Commission recomendation siam angin state-in ke a pen zel a. Post Devolution Revenue Deficit Grant dawn dan tur pawh mumal takin siam a ni. Kum 2023 khan cheng vaibelchhe 122.83 hmuh a ni a, kum 2024- 2025 ah vbch. 89.91 thlatinin dawn a ni. Nakumah thlatin cheng vbch 48.83 hmuh tur niin, hetiang hi 15th FC-in recomendation a siam dan a ni. Kum tinin state sum hmuh tur a hniam zawngin a kal zel a ni.
“Thil man hi kum tin a sang chho zel a, thiam tak leh fimkhur taka sum hman a ngai. Chutiang karah chuan kumtharah VC leh LC inthlan neih a ngaih dawn bakah kumtawpah LADC inthlan kan hmachhawn dawn a; 2026 kumtir lamah AMC inthlan buatsaih a ngai dawn bawk. State sum thlirin, nakumah inthlan pawimawh tak tak hmachhawn tur kan nei a. Sawrkar chuan mipui nghawng lo thei ang bera inthlan kalpui turin ruahmanna siam a tum a ni,” a ti.