Crystal Palace an chak zel

Pathianni zing khan Las Vegas khawpuiah UFC 320 neih a ni a, kawnghren chuhna insual ngaihven hlawh takah champion hlui Alex Pareira chuan awlsam takin champion lai Magomed Ankalaev a hneh a, light-heavyweight-ah a champion nawn leh. Ankalaev a tlawm lai hian bantamweight champion lai Merab Dvalishvili chuan a kawnghren a humhim ve thung.
Fighter tha zet mai Alex Pareira leh fighter tha chak tak Ankalaev te hi thla sarih liam ta khan UFC 313-ah an lo inhmachhawn tawh. Hemi tum hian Pareira hian beisei a phak lo viau a, round nga chhung an inbeih hnuin chak lo zawkah a tang a, a kawnghren kawl lai a hloh. Ankalaev lakah beisei a phak loh em vangin Ankalaev hi a hlau nia ngaiin Pareira hian sawisel a hlawh zui hle.
Ankalaev nen kawnghren inchuh nawn leh theihna hun remchang an nei a, Pareira hian tlawm nawn a tum tawh lo hle. A vawi hnih nana an inhmachhawn hmain Pareira hian an inbeih hmasak tum khan a inpeih lo viau a, 30% vel chauhin a fit thu a sawi. An inhmachhawn nawn lehna turah erawh a inbuatsaih tha viau a, 100%-a a inpeih tak at thu a sawi. A khingpui tur Ankalaev hi zilh hlakin, a ben ngei tur thu a hrilh nghe nghe.
Fight ngaihven hlawh tak chu Pathianni zing khan a takin a thleng ta a, beisei phak lovin a tawp ta tlat thung a, awlsam takin Pareira a chak. Chak ngei tumruh taka inlan, a rilru tawt leh a lo tlawm hmingchhiat tawhna zawng zawng rul let ngei tura a khingpui laka inhrikthlak tumruh urhsun tak Pareira hian round khatna an tan chiah atangin a khingpui a nawr nghat. Ankalaev a hlauh lohzia khawvel hriatah a lantir a, a khingpui hi a nawr buai nghal.
Ankalaev hian Pareina hual behna atan talchhuah tum viau mah se a talchhuak mai thei lo. Pareina kut thlak na zet mai chuan a tukhumah tak a deng fuh zui ta siah a, Ankalaev a talbuai zui nghal. Pareina hian fuh tak takin a khingpui a hnek fuh siah siah a, a kiu-a vawi li ngawt a nghawk zawk hnuin referee Herb Dean chuan fight a titawp a, Pareira chuan techninacal knock-out a hnehna changin Ankalaev lakah phuba a la a, light-heavyweight ah a champion nawn leh ta a ni.
Ankalaev lakah awlsam taka a chak hnuin Pareira chuan, “Kan inhmachhawn hmasak tum khan ka inpeih loh thu ka sawi a, tute mahin min awihsak lo. Tunah chuan ka inpeih ta at a, thil thleng chu an hmu ta ngei e!” tiin an inbeih hmasak tuma a inpeih loh thu a sawi nawn leh. Chak lo zawk a lo nih zauh tawh vangin Ankalaev lakah Pareira hian rin a kai zo tawh lova, an inbeih nawn lehnaah pawh hian Ankaleav chak tura ringtu an tam zawk. Mah se, Octagon chhungah a taka an inhmachhawn meuh chuan minute 1 leh second 22 chhung lekin Pareira-a’n Ankalaev a tukdawl hman der. Ankalaev a hneh dan hian Pareira hi fighter ropui a nihzia a lantir chiang leh zual.
Fighter tha bik Pareira hian 2021 khan UFC a luhchilh a, fight vawi sarih chauh hmachhawnin division hnihah a champion nghal der a, UFC-ah devision hniha champion reng ber a ni. Ankalaev a hneh hnuin heavy-weight-ah kaisan zui leh a duh thu a sawi zui leh bawk. Middleweight leh light-heavyweight-ah a lo champion tawh a, Pa lian huangah insawn a, a champion zui leh thei ngat a nih chuan UFC fighter ropui berah a chhal ngam hial mai thei a ni.
UFC 330 a kawnghren inchuhna dangah bantamweight champion Merab Dvalishvili chuan a kawnghren chuhpuitu Cory Sandhagen unanimous decision in a hneha a champion nawn leh. Dvalishvili hi UFC-ah vawi 14 ngawt a chak zawn ta a, UFC chak zawn rei zual zingah a tel. UFC a chak zawn rei ber chu vawi 16 chak zawn thei Anderson Silva a ni a, Dvalishvili chungah hian vawi 15 ve ve chak zawn Islam Makhachev leh Kamaru Usman te an awm.