Taylor Swift ‘The Life of a Showgirl’-in record siam nghal

Taylor Swift ‘The Life of a Showgirl’-in record siam nghal
Taylor Swift chuan a studio album 12-na ‘The Life of a Showgirl’ chu Zirtawpni kalta khan a tlangzarh ta a, a nikhatnaah US-ah album copy maktaduai 2.7 an hralh nghal a, Taylor Swift album tlangzarh tawh zinga ni khata US-a hralh tam ber a la ni a, 1991 atanga album hralh dan mumal taka Luminate-in an chhinchhiah tan atanga album tlangzarh tawh zawng zawng ni khata hralh tam ber a la ni a, ni khat chhungin kar khat chhunga album hralh tam ber dawttu a ni nghal bawk. Hei aia kar khata US-a album hralh tam theih awm chhun cu Adele ‘25’ kha niin, 2015-a a tlangzarh khan an tlangzarh atanga kar khat chhungin maktaduai 3.378 an hral thei.
The Life of a Showgirl hi a vinyl album an hralh tha hle a, maktaduai 1.2 an hralh tling a, modern-era (1991 hnulam) a kar khat chhunga vinyl album hralh tam ber a la ni. A hmaa hetiang record chu Taylor Swift album ‘The Tortured Poets Department’ kha niin, 2024 khan kar khat chhungin US-ah 8,59,000 an hralh.
The Life of a Showgirl album tlangzarh hun tur hi August ni 12 khan puangin, Swift official webstire-ah preorder an hawng zui nghal a, tunah hian album hi standard CD, vinyl leh digital download a tihchhuah a ni. He album hi Billboard 200 (US albums) chart-ah pawh No.1-ah a debut ngei dawn tih a chiang nghal a, chart ranking siam nan hian kar khat (Zirtawpni atanga a karleh Ningani thleng) chhunga album hralh belhkhawm thin a ni a, ni khata maktaduai 2.7 hralh theih hi kar khatah chuan maktaduai 3 a tling ngei dawn tih a rin theih a, Adele ‘25’ record pawh hi a khum theih an beisei. Swift hian No.1 album 14 nei tling tawhin ‘Showgirl’ hi a No.1 leh chuan No.1 album 15 a nei tling tawh dawn a, Drake leh Jay-Z te nena No.1 album 14 nei theuh neia, No.1 album ngah ber ni ho mek khan Drake leh Jay-Z kalsanin, amahin record a siam tawh ang a, soloist anga No.1 album ngah ber a ni ang a, soloist chauh ni lo, a nawlpuia lakah paw No.1 album 19 nei The Beatles chiah a pha lo ang.
Taylor Swift hian kar khata US-a copy maktaduai hralh tlin theih pariat a nei tling ta a, Poets, 1989 (Taylor’s Version), Midnights, reputation, original 1989, Red leh Speak Now te niin, Taylor Swift hi kar khata US-a album copy maktaduai chin hralh theih ngah ber a ni bawk.