CYMA-in dan loa hnamdang sumdawng tihtlem tum dawn

CYMA-in dan loa hnamdang
sumdawng tihtlem tum dawn
Central YMA chuan Mizorama hnamdang sumdawng, phalna nei lo tam ta lutuk titlem turin hma a la dawn.
Sakawrdai Chengkawlawn Run-a YMA Inkhawmpui Lian vawi 75-na neih mekah Nilaini khan rorel a ni a. YMA khawih zingah – Mizorama hnamdang sumdawng, phalna nei lo tam ta lutuk titlem tura hma lak, Mizo hmeichhiaten hnamdang pasala an neih zel lohnan Central YMA-in nasa zawka inzirtirna kalpui; Zohnahthlak chi peng hrang hrang Mizorama chengte zingah chibil hmalakna a awm tawh lohnan Central YMA-in hma lak; Mizo infiamna chawisan a nih theihnan hma lak; YMA inkaihhruaina, nihphung leh hruaitute mawhphurhna rampuma inzirtir thar a tel.
Sawrkar khawihah, tun aia khauh leh awmze nei zawka inner line permit kalpui a nih theihnan sawrkara thlen; tui hnar humhalh dan siam tura nawr; inkalpawhna kawngpui hrang hrang a chhiat avanga mipuiin harsatna kan tawk nasa lutuk thin a ziaawm theihnan Mizoram sawrkarin tun aia chak zawkin hma la tura nawr a tel a ni.
Kum 2025- 2027 kumpuan atan “Ruihhlo Do” thlan a ni a. Central YMA budget (2025- 2026) atan Rs. 21,149,935 pawm a ni a. 2024- 2025 budget Rs. 20,331, 980 aia a punna hi Rs. 817,955 (4.02%) a ni.
Kum 2027 YMA Inkhawmpui Lian chu Vairengte Joint YMA thlen turin Vairengte-a nghah pawm a ni.