Dan kengkawh tur ruihtheih thila fihlim thalai tam tak kan la nei e – Home minister

On May 19, 2025 7 0

Dan kengkawh tur ruihtheih thila
fihlim thalai tam tak kan la nei e
– Home minister
Police lak turah dan leh hrai kengkawh turin ruihtheih thila fihlim thalai tam tak kan la nei tih Home minister K Sapdanga chuan a sawi a. Mipui rawngbawl tur an nih avangin dik takin police hna hi an la dawn tih a sawi.
ZPM Gen. Hqrs buatsaiha Aizawl Municipal huamchhunga ZPM local council member-te tana political training neih a hmanpuinaah Home minister chuan police hna lak chungchangah chief minister duhdanin dik leh fel taka tih a ni a, sawisel kai lo turin an inveng a; hemi kara thil felhlel ti an awm a nih chuan an chungchang an ngaihtuah a tul dawn tih a sawi.
“Dan leh hrai kengkawh tura ruihtheih thila fihlim thalai tam tak kan la nei hi a lawmawm hle a, dik takin a tlingte kan la dawn. Mipui rawngbawl tur an nih avangin kan uluk hle a ni,” a ti.
Hun hmasa lamah dan leh hraiin ngaihpawimawh a hlawh lem loa, ZPM sawrkar a pian hnuah erawh eptu party-te thlengin dan ngaihpawimawhna kawngah kan thangharh ta hle nia a lan thu K Sapdanga hian a sawi. “Khawvel huapin Mizo society tluka nuam hi a awm bik chuang loa, chutihrualin kan zalenna hmanthiam kawngah erawh zir tur kan ngah hle. Naupang deuh atanga kum upa lam thlenga zalenna kan hmangsual thin hi siamtha turin local council member-te kan pawimawh em em a. Hmasawnna hna thawh kawngah pawh kan rinawmin kan dik tur a ni a, midangte entawntlakin kawng tinrengah hma kan la tur a ni,” a ti.
Chief minister-in an sawrkar tirh atangin mutkham ni a la neilo tih a sawi chu a pawm tih Home minister hian a sawi a. “File-in zan a riak tur a ni lo, a tih vangin kan thawkrim em em a, kan official-te an phur a, an hah em em a, ZPM sawrkarah chuan kan thawkrim a, hlim pawh kan hlim a ni. Kum khat leh a chanve kan sawrkar chhung hian sawrkar kalphunga siamthat ngai thil tam tak siamthat chhoh mek a ni a, aikal la an awm leh awm loh pawh local council-ten min lo ngaihven pui a, report rawn pe zung zung turin kan beisei che u a ni,” a ti.