Dan loa ding khua ho sawrkarin tuamhlawm

Sawrkarin dan anga din a phalsak ni lo, khaw din an endiknaah sawrkar atangin hamthatna hrang hrang an dawng ve tho tih hmuh a nih thu Mizo Students’ Union chuan an sawi.
MSU Gen. Hqrs. hmalakna in Mizoram-a dan loa khaw tih tawp a nih theihnana an beihna kal zelah dan loa khaw din 11 awm chu enfiah mek a ni a, Lunglei district-a khaw pathum an enfiah tawh.
Putlungasih VC ramchhung ami Pangtlang (New Vuakmual tia sawi bawk) ah chuan in 68 awmin mi cheng 300 vel an cheng a, vote nei 109 an awm. Belthei VC ramchhung ami Phairuangchhuah-ah in 42 awmin, mi 200 vel an cheng a, vote nei 98 an awm. Lungsen-II VC huamchhung ami Sihphirtlang-ah in 39 awmin, mi 150 vel an cheng a, vote nei 49 an awm. Heng khuaa cheng hi Chakma deuh vek an ni tih an sawi a ni.
MSU hruaitute sawi danin, dan loa khaw dinah hian sawrkar hmalakna – electric connection, tui connection leh 15th Finance Commission atanga hnathawh a awm a; zirna in bakah kohhran hrang hrang hmalakna a awm. Dan loa khaw din 11 awmah khaw 8 an la hmabak a, enfiah vek an tum a ni.
Dan loa khaw din enfiahnaah hian Directorate of Local Administration Department atangin joint director ST Lalhmingmawia leh LAD Lunglei atangin DLAO Beithlotha Nohro te pawh an tel a ni.