Darkar 24 chhunga step a lawn hnem record siam

Army commando thin, Himmat Singh Rathore, kum 40, Rajasthan a cheng chuan darkar 24 chhunga chho zawnga step a lawn hnem record a siam a, step 70,679 a lawn hman. A hmaa hetiang record chu Christian Roberto Lopez Rodriguez, Spain ami siam niin, ani hian July 2023 khan darkar 24 chhungin step 70,242 a lawn hman ve thung.
Himmat-a record siam lai hi physical education teacher rualin an endik a, a endiktute chuan darkar 24 tlin hmain Himmat hian record a siam hman tawh niin an sawi a, an evidence te Guinness World Record-ah an theh lut nghal a, mahse, Guinness lam hian official-in record a siam thu hi an la puang lo thung a ni.
March thla kalta khan Himmat hian India Book of Records-ah a hming a lo chuan tir tawh bawk a, chumi tum chuan darkar 24 chhungin step 86,400 chho zawng leh chhuk zawngin a kal hman a (chho zawngin 43,200, chhuk zawngin 43,200), hei hi darkar 19 leh minute 46 leh second 16 chhungin a kal hman a, heta tang hian Guinness World Record siam a tum ta a ni.
ETV Bharat-in an kawmnaah Himmat chuan step 1,00,000 lawn hman a tum a, mahse, khawlum lutuk avangin Rodriguez-a record a khum hnuah a duhtawk ta mai niin a sawi.