DARLAWN LAMTLUANG

By Zoremi Hmar Zote

Ina tawm reng chu màwl sa nen, kan mawl belh zual dawn e tiin zin khawthawnna tur ka ngaihtuah ruai a, Darlawnah ka nutei te an awm alawm tiin zan hnih lek riak tura Darlawna zin tur chuan rilru ka siam fel ta a, mahni chauha kal lovin ka fapa ka hruai sauh sauh a, Darlawn Sumo chu kan lo châng ve ta ràn a.
Chhun dar 11 vel atangin Sumo chu kan lo nghak a, traffic jam a nasat avangin dar 1 velah a lo thleng chauh a, kan bungrua te hlâng felin Aizawl chu kan chhuahsan ta. Zemabawk dâi ang em ema kawng diak nasa saw a tam lo ngawtin ka ring; two wheeler tan phei chuan tlan ngaihna a vâng ngawt ang, ke pali nei pawh kan tlan tha thei lo lek lek a nia! Sawlai kawng saw a pawimawh si a, kan sawrkar chak tak hian hma la se la, siam that atan a tha ngawt mai. Zin vei vâkte kawtchhuah lûn lai tak mai sawti taka a chhe diak kâwi mai saw chu a mawi lovin a mualphothlâk a ni. Kan ram hmel lanna pakhat atan kan kawngpui that leh that loh hi tehna pakhat a ni ve a, khawpui chhung ang deuhthaw a la ni a, thu neitu ten ngaihtuah rang se la a duhawm khawp mai.
|awngtaina hmun kan han thleng a, driver chuan kan zinga nu phanchang deuh ber chu tawngtai turin a han sawm a, a tawngtai zawh chuan zunram te thiarin kamram ilo fahran kan han lei nak nak a, kan kal leh ta. Bawngkawn atanga rawn chuang ve nu pakhat chu a tawng duh suah suah hle mai a, fiamthu te thawhin a nui báwk bâwk a, khua a tihar lovin a titi ngaihthlak a nuam ngei mai. Kawng a ziaawm ta bawk a, kan tlan tluang hle a, Seling zero point atangin vei lamah kan peng a, kawngkama thing ding dur khup mai kara zo thlifim thaw heuh heuh dawng chunga han tlan te chuan taksa mai piah lamah rilru thengin min tiharh sawng sawng thei. Kawng a tha em em mai a, a kual kawi nasa tih lohah chuan nuam tak a ni.
Rei ngial kan tlan hnu chuan khing lai tlangdunga Hotel lâr ber mai, ‘Pari Hotel’-ah ngei mai chuan thil ei turin kan chawl a, an eitur siam a tuihnaiin tui pawh a tui hle. Mikhual dang chawl ve te chu Aizawl lam pan tur te, a then haw lampang te an ni nuk a, mipa, hmel en reng renga hna thawk nasa tih hriat reng, khawpui milian fate anga Gym kal buai ve ngai miah lova exer la tha tih hriat ngawih ngawih, tihrawl phiar fat mai te, hmeichhiaah pawh tuk tin kâwla ni chhuak chhiara ramdaia sadaiek ham pherh tuk tin tih hriat ngawih ngawih kut phawkphawhraw hrup mai te an ni nawk a, hlim tak maiin an titi bawrh bawrh a, duh apiang nei thei te pawh an hlim chuan lohna khawvel leh hah taka hna thawk chung si-a an hlim em em tho si-na khawvel chu lei dawn ila a man a into hleih ngawt ta ve ang!
Kawng mam nuam zetah chuan la phiar dûk ang par parin kan tlan zel a, Kepran khua, zo khuaah pawh la zokhua tak mai kan thlen chuan ka mit hi a indaih lo a ni ber. Thingtlanga pianga sei lian ta chuan thingtlang khua ka ngainat hi a reh thei lo a ni ber e. An in sak dan te, an khawthleng awm dan leh an kawtlai awm dan te, meikhu rim kara vawk in rim rawn nam leh hak thin te chuan ka lung hi an tileng em em mai zu nia! Sawleng kan thleng a, khaw nuam tak a ni; an khaw chhung kan luh tan phat atangin tlan muang deuh tawh ila, duh tawka thlir kual ka chak mang e ka ti rilru neuh neuh a, mahse Sawleng pawh kan tlàn pel leh ta. Sawleng atang chuan Darlawn chu a hla tawh lo hle a, tluang takin kan thleng ta. Aizawl atanga Darlawn hi darkar nga vel chiah chiah kan tlan a ni.
Ka nutei te in chu kawngpui kam chiah a nih avangin an kawtah chuan Sumo chu a ding ta, ka nutei chu a rawn tlan chhuak var a, kan thawmhnaw te hlang thlain kan hlim hle. Arsa, Mizo chawhmeh siam dan dik takin, buh tlem leh anthur rep thlak a lo siam a, puar el euvin kan ei; Darlawn chu a boruak a nuamin a fresh hle a, a zo deuh bawk a, ruah a sur deuh vang pawh a ni mai thei, vawh pawh a vawt deuh. Kan han inphih fai a, titi khawchang kan sawi nual hnu chuan kan chau ve deuh bawk nen, kan mu ta a.
A tuk khua a lo var chuan hlim tak maiin kan tho a, ka nutei te awmna hi khaw hmawr deuh a nih avangin khaw chhung tak tak kan lut lo va. Tukthuan te kan ei kham chuan khaw chhung fan chu kan tum ruh hle a, kan chhuak ve ta râwih a. Ka nutei tunu Felfeli chuan min han hruai kual ta a, ka rin ai daihin Darlawn khua chu a lo pui! In leh lo tha tak tak leh lirthei chi hrang hrang a lo tam mai a, an khua a fai si, mihring chengte an polite-in biak an nuam em em mai bawk si, Mizorama khaw tam tak zingah a chhuanawm pawl an nih ngei ka ring. Taxi kan la a, YMA Park te kan va fang a, Zo khua ang deuh hian an lo cheibawl a, Lal in te, Zawlbuk te lo awmin an lo vawng fai tha em em mai a, thla te kan lak hnu chuan kan haw ve ta a. In 1000 zet awmna khawpui nuam zet chu a tuk maia hawsan atan chuan a pamhmai hle; mahse châm reng hman kan nih bik si loh avangin a tuk zing hma takah chuan kan rawn hawsan leh ta a, remchang hmasa berah ka zin leh ngei ngei ang!