Tlabung RD Block hawng

Tlabung RD Block hawng
Mizorama Rural Development Block 28-na turin Tlabung RD Block chu Nilaini khan RD minister Lalruatkima’n a hawng a. Tlabung RD Block office hawng nghalin office building thar sakna tur lungphum a phum nghal bawk.
RD minister chuan Mizoram history-a hmun pawimawh tak luahtu, Mizoram kawtchhuah hmasa Tlabungin RD Block a nei ta chu a lawmpui tih sawiin, kum 30 hnu ah Mizoramin RD Block thar pahnih – Kawrtethawveng leh Tlabung RD Block a nei leh thei chu thil chhinchhiah tlak leh hmasawnna ropui tak a ni tih a sawi.
RD Block thar neih chu thil awl ai lo tak leh harsa taka sual chhuah a ni tih sawiin, “Mizoramah hmasawnna rualkhai a awm theihna’n sawrkar chuan thuneihna semzai leh kan banphaka sawrkar chhawpchhuah zel a tum a ni,” a ti.
Tlabung RD Block chuan department hrang hrang hmalakna a keng tel dawn a, heng hmalakna tihlawhtling tur chuan Block mipuiin thawhpui thiam a tul dawn tih a sawi a. Tha taka sawrkar thawhpuia finchhuah thin turin minister chuan mipui a chah.
He hunah hian Lunglei High Powered Committee vice chairman Lawmawma Tochhawng leh West Tuipui bialtu MLA Nihar Kanti Chakma te pawhin thu an sawi a ni.
2022 March 25-a Council of Ministers thukhawm chuan Kawrtethawveng RD Block leh Tlabung RD Block siam tura rawtna lut a pawm a. Tlabung RD Block hi 2022 May 20 khan Lungsen RD Block leh Bunghmun RD Block atanga thenhran niin, Block chhungah hian authorised village 17 leh authorised sub village 10 a awm.
RD Block office bul tan turin BDO hmasa ber atan state sawrkar chuan Tlabung SDO (Civil) H Zonunmawia a ruat a, MGNREGA atangin staff 16 an awm tawh a ni.