Infiammi hlawh hnem ber ni thei Mbappe

Paris St-Germain forward Kylian Mbappe chu Saudi Prp-League club Al-Hilal in lak tumin an dawr mek a. Al-Hilal a zawm a nih chuan infiammi zawng zawng zinga hlawh hnem ber a ni thei thei dawn.
Al-Hilal hian PSG hnenah Mbappe hi £259million sengin lei an dil a, an dilna hi PSG chuan an pawm tawh. Mbappe hian Al-Hilal a zawm a zawm a nih chuan chawlhkar khat chhungin £11.6m zet a hlawh thei dawn a. Al-Hilal-a contract a hman zawh meuh chuan £603m zet a hlawh thei dawn. Hetiang zat a hlawh a nih chuan infiammi zinga hlawh hnem ber ni mek Cristiano Ronaldo hlawh zat chu £430m tehrengin a la khum var var dawn. Infiammi zinga hlawh hnem ber ni mek Cristiano Ronaldo hian An-Nassr-a contract a hman zawh thlengin £173m a hlawh thei dawn.
PSG leh Al-Hilal te Mbappe man leh mualah inremin, infiammi zinga hlawh hnem ber nih theihna hun tha nei bawk mah se Mbappe hian Al-Hilal a zawm duh kher dawn em tih a la chiang lo. Kum 24 mi chauh a la ni a, tunlaia forward tha ber pawla ngaih niin, hmabak a nei eng viau. A kum a la naupang a, atan chawimawina hlu tak tak dawn tur a la awm teuh. Europe-ah a khel lo a nih chuan chawimawina sang dawn a harsat phah ngei dawn. Heti a nih vang hian Saudi Pro-League vela a theihna leh thiamna ril lantir chu uiawm a la ti rih niin tarlan a ni. Report thar lam berah chuan Mbappe hian Al-Hilal zawm tumna a nei lova, indawr buangbar pawh tul a ni lo.
Tarlan tawh angin Al-Nassr leh Portugal forward Cristiano Ronaldo chu infiammi zinga hlawh hnem ber a ni mek a, a contract hlut zawng hi £173m a ni mek. Pahnihnaah Al-Ittihad forward thar Karim Benzema a awm a, Benzema contract hlut zawng hi £172m a ni ve thung. Infiammi zinga hlawh hnem pathumna chu Golfer Phil Mickelson a ni a, a contract hlut zawng hi £142m a ni. Palinaah Al-Ittihad midfielder N’Golo Kante a awm a, Kante contract hlut zawng hi £86m a ni ve thung.
Saudi Pro-League club te an hausa thar hluai a, player hlawhah an sen huai em vangin infiammi hlawh tam zual zingah footballer an ther ta fuk. Golf te, Basketball leh F1 te hi sum tamna thin a ni a. Saudi Pro-League in thil a thlak danglam nasa rih viau.
Infiammi hlawh hnem zual 10 zingah Lionel Messi – £48m (Inter Miami), Neymar – £47.5m (Paris Saint-Germain), Jaylen Brown – £47.3m (Boston Celtic), Max Verstappen – £44m (Red Bull F1) leh Nikola Jokic – £42.5m (Denver Nuggets) te an tel.