Davis Cup 2023 khel tur zawnna hnu-hnungah Great Britain chuan Colombia an hneh a, inelna lian an hmachhawn thei dawn. Great Britain bakah hian Switzerland leh France ten inelna lian an hmachhawn thei dawn bawk.
-- Advertisement --
Colombia nen an inhmachhawn tum hian Great Britain player pawimawh Dan Evans chu World No. 253 Mejia hneh lovin a tlawm nghal ringawt a, inlehthalna lian a thleng nghal. An khelh hmasak berah chak lovin, hnufual zawkah tang hmasa zet mahse Juan Sebastian Cabal leh Robert Farah te tang dun chuan an khingpuite 6-4 6-4 in an hneh let ve thung a, 1-1 a ni ta chiah. 1-1 a nih hnu hian British No. 1 CameronNorrie chuan a khingpui Nicolas Mejia chu set hloh lovin a hneh zui leh a, Davis Cup khel turin an tling zui ta a ni.
Davis Cup khel tur zawnna dangah USA chuan 4-0 in Uzbekistan an hneh a. World No. 1 Novak Djokovic tel lova in lan Serbia chuan awlsam takin Norway an hneh a, Switzerland chuan harsa taka Germany hnehin an tlang hram a. Switzerland ang tho hian France pawhin 3-2 a Hungary hnehin inelna hmachhawn turin an tling ve bawk.
Tennis hmanga ram aiawh mipa team te inelna Davis Cup 2023 hi September 12-17 chhungin khawpui hrang pali-ah khelh a ni dawn a. Inelna hmachhawn turin champion lai Canada leh pahnihna ni mek Australia te direct in an tling a. Wilcard hmangin Italy leh Spain an tling tawh bawk. Ram 16 inelna tur Davis Cup hmachhawn tur a hriat nual tawh a, a la hriat kim theih rih loh thung.