February 4, Inrinni zan khan English Premier League (EPL) 2022-23 khelh chhunzawm a ni a. Team talbuai Everton chuan Goodison Park-a an mikhual Arsenal an barakhaih a, si khat faiin an hneh. Inkhel dangah Wolves in si thum fai ngawtin Liverpool an sawp a. Kim lo zawk ni chungin Manchetser United chuan Old Trafford a an mikhual Crystal Palace an hneh ve thung.
-- Advertisement --
Manager thar hnuaiah harh tharna
Premier League-a team talbuai, tlahniam thei dinhmun a ding mek Everton chuan an manager Frank Lampard an ban a. Siamtharna beiseiin Sean Dych an la lut. Manager tawnhriat ngah Dych hnuaiah an player te an phur thar a, huaisenna thar neiin fiahna hmachhawn an chak. An phurna tisosang leh zual turin Goodison Park an mikhual Arsenal an hneh ta hial a, Toffees hian tlak hniam lam ngaihtuah buai hauh lovin hma lam pan an tum ngei dawn e!
An elpui liante khelh zat khel a, point 8 a hmahruai fal thei turin Arsenal hian Goodison Park-ah chak an mamawh a. EPL an khelh hnuhnung bera Manchester United hnehtu an nih vangin team talbuai Everton lakah point thum hmu ngei tura ngaih an ni sa bawk. Chak tura rinkai zawk ni mah se chak phu zawk chu Everton an ni ta daih thung.
Goodison Park-a lenglut Arsenal hian beisei angin an khel tha tawk lova, Chelsea atanga an lak luh thar Jorginho chu bench atangin lut mahse a team thar tan danglamna a thlen thei bik lo. Tlak hniam pumpelh tura chak mamawh em em Everton hian point hlawhchhuah ngei tumin League hmahruaitu an hmachhawn a, an khel tha viau bawk. Inkhel hmuhnawm pangngai takah goal lut a awm theih lawk loh hnuin minute 60-naah James Tarkowski chuan Dwight McNeil corner pet chu tha zetin a tauh lut a, hmahruaina goal a thun.
Table chung ber luahtu Arsenal lakah hmahruai zawk an nih vangin Toffess an phur a, inrintawkna sang zawk nen an mualah an inlan chhunzawm a,an mikhual Arsenal hi hun tawp thlenga dang chat tluan a, EPL an hmachhawn hnuhnung vawi 11 zetah a vawikhat nan hnehna an chang. Hun rei tak hnuah an chak nawlh a, point thum an hmuhna pawh League hmahruaitu Arsenal ber kher an ni leh zel hi Everton tan a hluin, a ropui leh zual bik hle. Arsenal hnehtu Everton hian EPL season kal mekah vawi 21 khelin point 18 an hmu tawh a, tlahniam thei dinhmunah an la ding mek.
Table hnuai lama awm Everton lakah an tlawm vangin Arsenal hmahruaina a derthawng. Gunners hi an hnuai chiaha awm Manchester City aiin point 5 in an sang zawk mek a. Pathianni zanah City in Tottenham an hneh a nih chuan an inkarah point hnih lek a tla zep tawh thung ang. Everton hneh lo khut mah se Arsenal manager Mikel Arteta chuan a team te a dem duh lova, “an tha zual sauh sauh zel’ tiin a naute fakna thu a chhakchhuak hlauh thung.
Liverpool an pul leh tawh
EPL season kal mek hi team ropui Liverpool tan season khirh leh harsa a ni a, an che ropui lo hle. Table-ah 10-na luah mektu Reds hi inrin zan khan Wolves lakah si thum fai ngawtin an tlawm a, an pul nawn leh.
Molineux Stadium a lenglut Liverpool hian chak mamawh em em chungin bul an tan chhe hle. Inkhel tan atanga minute 5-na lekah Joel Matip chuan Hwang Hee-chan cross chu an lamah a dang pial lut a, mualneitu team hmahruaina goal a thunsak. Hma takah goal an thun hial Wolves a fuih phur lehzual a, goal pawh an thun belh leh thuai. Minute 12-na lekah Reds tlarhnung pherh tak chu Wolves hian an hrem a, Craig Dawson chuan an goal hnihna a thun. Hma takah goal hnih an chhuah vangin Reds an buai zui a, an insiamtha hleithei lo.
Goal thun mamawh Liverpool in an si phurh sut ngei tumin thapui an thawh a, goal thun ngei tumin tan khawh bawk mah se an hlawhtling thei lova, goal thun an mamawh viau laiin goal an chhuah belh leh ta zawk. Minute 72-naah Ruben Neves chuan Adama Traore thawh rah sengin an goal thumna a thun a, Wolves chakna a nem nghet zui nghal. Hun tawp thlengin goal dang a luh belh thei lova, Wolves chuan an mikhual team lian Liverpool chu si thum fai ngawta sawp in, an tualzawlah ngei point thum hlu tak an hmu.
United an chak e
Team lian pahnih; Arsenal leh Liverpool an tlawm laiin Manchester United chuan Old Trafford-a an mikhual Crystal Palace an hneh a, point thum an hmu. Palace an hneh tum hian midfielder pawimawh Casemiro hnawhchhuah a ni a, Brazil midfielder hi khelh thum chhung United tan a inlan thei dawn lo.
United hian an mikhual Crystal Palace lakah bul an tan tha viau a, inkhel tan atanga minute 7-na lekah penalty an hlawhchhuak nghal. Hma taka penalty an hlawhchhuah hi Bruno Fernandes chuan awlsam takin a pet goal a, hmahruaina goal a thun.
United in hma taka goal an thun hnu hian goal a lut a han deuh vang vang a, minute 62-naah goal dang a luh belh thei chauh. Minute 62-naah Marcus Rashford chuan an goal hnihna thunin, an hmahruaina a tizau. Rashford hi World Cup hnu lamah a khel tha tluan hle a, United tan goal a la thun tluang zel.
United in si hnih faia hma an hruai hnu lawk hian Hughes a reh vangin Casemiro hnawhchhuah a ni a. Tlem zawk an nih hnuin Minute 76-naah goal an chhuah zui nghal a, Palace tan Jeffrey Schlupp-an goal a thun. An dinhmun derthawng hman mahse United hian harsa takin hnehna an chang ta tho a ni. Palace an hneh leh tak vangin United hian champion beiseina an nei sang leh zual ta sauh bawk.