Delhi BJP in inthlan urlawk tan, AAP chhuahsan hlim Gahlot telh

Delhi BJP in inthlan urlawk tan, AAP chhuahsan hlim Gahlot telh
AAP chhuahsan hlim, transport minister hlui Kailash Gahlot chu BJP a zawm hnuah dinhmun pawimawh tak chelhtir niin, an party campaign duangtu zingah telh a ni.
Member 70 awmna Delhi assembly inthlan hi nakkim February thla khian neih a ni dawn a, hemi atan hian Delhi BJP chuan coordination member tur ruatin, hetah hian Gahlot pawh hi an telh ve a ni.
Delhi BJP thuchhuah chuan Gahlot bakah hian state general secretary Vishnu Mittal leh state president hlui Satish Upadhyay te pawh committee member-ah hian an tel thu an tarlang.
Delhi BJP president Virendra Sachdeva chuan an party chuan inthlan campaign kalpui tan zelin, khawpui chhung hmun hrang hrangah ‘Parivartan Yatra’ an kalpui thuai dawn thu a sawi a, he yatra atan hian member 9 awmna committee din niin, an state president hlui Upadhyay-a chuan a ho dawn tih a sawi.
He panel-ah hian an party mi pawimawh tak tak telin, Rajiv Babbar, Rekha Gupta leh Raja Iqbal Singh te pawh an tel thu party thuchhuah chuan a tarlang.