Kum khat chuang an indo hnuah Israel leh Hezbollah ten inkahhai puang ta

Lebanon-a Israel leh Hezbollah indona chuan kum khat chuang a awh hnuah inkahhai an puang ta.
Inkahhai hi an ram huna Nilaini zing dar 04:00 (India-a zing dar 07:30)-ah hman tan niin hei hian thla 14 dawn Israel leh Iran-in a thlawp hel pawl inkahna chu a titawp lailawk dawn a ni.
Inkahhai puang tura inremna hi Thawhlehni zan khan Israel, France leh US chuang puangin President Joe Biden chuan hei hi ‘inremna tluantling atana kawng zawhna’ a nih thu a sawi.
Inkahhai kalpui a nih tan hma lawk thleng hian lehlam lehlam hi an inkap tawn reng a ni.
Israel chuan inkahhai kalpui hma darkar li emaw lekah pawh Beirut hmun thenkhata an kah dawn avangin insaseng tura tihna an la tichhuak a. Hezbollah pawhin hunbi chhiat tan hma lawk thlengin Israel-ah drone an la thlawh luhtir ve bawk.
Inkahhai kalpui atanga reilo teah Israel Defense Forces (IDF) chuan Lebanon chhim lama chengte chu ‘IDF-in insasengsan tura a tih khaw lama let lo tur leh IDF awmna lam pan lo turin’ an ti.
IDF Arabic thupuangtu, Avichay Adraee chuan X-ah IDF chuan ‘ina kir theiha a him hun tur a puang dawn’ tih a tar lang.
Hetih lai hian Reuters news agency chuan lirthei eng emaw zat chuan inkahhai puan hnu lawk atangin chhim lam an pan nghal tih a tar lang a, thenkhat chuan an bungruate pawh an keng tih an sawi.
Indona hi kum khat dawn kalpui a ni tawh a, September thla tawp lamah khan Israel chuan Hezbollah-te chu bomb-a beiin lei lamah pawh an rûn bawk.
Tun tum indona hi Lebanon-a kum tam tak chhunga indonaa thihna thlen tam berna niin tual chhung thuneitute chuan mi 3,823 chuang an thi tih an sawi.
US rawtna anga inkahhai puan a nih hnuah hian Israel chuan Lebanon-a a sipai awmte chu ni 60 chhungin zawi zawiin a hnukdawk ang.
Hetih chhung vek hian Hezbollah fighter leh an ralthuamte chu Litani River chhim lam atangin an insaseng ve bawk ang a, helai hi Israel-Hezbollah indo hnuhnung ber, kum 2006-a ramri chin khaa ni a. An chhuahsan hmunah hian Lebanese sorkar sipaite an awm ang.