Delhi chauh lo, India-a district 60%-ah boruak a bawlhhlawh
Delhi chauh lo, India-a district 60%-ah boruak a bawlhhlawh
Delhi khawpuia boruak bawlhhlawh lutukin sawi a hlawh mek laiin zir chiannaah chuan India ram hmun dang pawh a him chuang lo tih hmuh niin district 749 zinga 60%-ah chuan boruaka bawlhhlawh, PM 2.5 chu a him chin aia tam vek a awm tih hmuh a ni.
‘Beyond city limits’ tih hming vuahah thlalem atanga lak behchhana boruaka PM2.5 awm zat ennaah chuan National Ambient Air Quality Standard (NAAQS)-in a him chin a tih, 40 µg/m³ chu heng district-ah hian a pel vek hlawm a ni.
Centre for Research on Energy & Clean Air-in an zir chianna, Manoj Kumar, Monish Raj, Panda Rushwood leh Rosa Gierens ten an ziahah hian Delhi, Tripura, Punjab, Haryana, Himachal Pradesh, Meghalaya leh Chandigarh-ah phei chuan an district zawng zawngah fur lai tih loh chuan NAAQS tiam chin hi an pel kumtluan niin an tar lang.
State leh union territory 33-ah WHO-in PM2.5 awm him a tih chin an pel vek a. Heng zinga 28 phei chuan WHO-in him chin a tih aia a let riat zeta sanga him chin tiamtu, NAAQS him chin tih an la pel cheu a ni.
Delhi, Assam, Haryana leh Bihar chu boruak a bawlhlawh tamna khawpui ngah er an ni a. Delhi chu a nasa ber niin PM2.5 awm hi 101 µg/m³ a ni.
Mihring cheng tamna, Indo-Gangetic phaizawl chu boruak a bawlhhlawh zualna ni vekin hmarchhakah Tripura leh Assam chu a bawlhhlawh chak zualna a ni bawk.
Tunah hian Delhi chuan chhum leivak leh boruak bawlhhlawh tak a tawng mek a, tun hnaiah phei chuan Ethiopia hmar lama tlang kang inphuh chhuak khât tak inphuh chhuak khuin a tuam a, boruak a tibawlhhlawh zual.
Hayli Gubbi tlang kang hi kum sing chuang hnua inphuh chhuak niin meivap, sulphur dioxide leh lung nawi a vawh chhuak a, India hmar lam thlengin a tleh lut.
Hetih lai hian Indian Meteorological Department (IMD) Director General M Mohapatra chuan tlang kang khu hian tun dinhmunah eng angin boruak bawlhhlawh theih danah nghawng a neih hriat mai a harsa rih niin a sawi a, van sang taka awm a nih avangin chuti taka nghawng nei a nih a rinawm loh niin a sawi thung.