Delhi Chief Minister Arvind Kejriwal chu Pathianni khan Delhi Excise policy case kaihhnawihah CBI headquarter-ah thu zawhfiah turin a inlan.
CBI chuan Kejriwal hi kar kalta Zirtawpni khan inlan turin an ko a, February 26-a he case kaihhnawiha man tak a deputy hlui Manish Sisodia chhuina kal zela thuhretu anga ngaih a ni.
Kejriwal thu zawhfiah a nih hma hian CBI headquarter-ah venhimna khauh taka kalpui niin Delhi Police te chuan Aam Admi Party worker tena harsatna an siam loh nan venhimna thuah li vel laiin an kalpui a ni.
CBI tena Pathianni khera Kejriwal thu zawhfiah an thlanna chhan hi officials te tana hun thawl zawk a awm ber ni nia an ngaih vang a ni a. Chawhma dar 11-ah Kejriwal chuan CBI hnuaia Anti-Corruption branch office thlengin thu zawhfiah nghal a ni a.
Nilenga thu zawhfiah chhung hian CBI te chuan policy formulation chungchang te a bik takin file thenkhat a chin hriat loha awm zui ta chungchangte an zawt dawn nia ngaih a ni.
CBI te chuan Delhi liquor policy kalpuiah sumdawng duhsak bik tena hlawkna an chan theih nana ruahmanna siam a ni em tih te, remtihna pek a nih hmaa policy siamah inrawlhna a nei em tihte pawh an zawt dawn tia sawi a ni.
Delhi deputy CM hlui Sisodia chu he case kaihhnawih vang hian Lung inah khungin a la awm mek a, March 31 khan special court chuan bail a dilna a hnawl zui bawk.
Delhi CM Kejriwal CBI ten thu zawtfiah
Get real time updates directly on you device, subscribe now.
Prev Post
Next Post