Sudan-ah Genral pahnih vanga buaina

Kar kalta Inrinni atanga Sudan army leh paramilitary forces te intihbuaina chuan harsatna nasa tak siamin civilian 50 chuangin an thih phah tawha sawi a ni.
Captial Khartoum-ah chuan silai ri hriat tur awm reng a, pawl pahnih te hian presidential palace, state TV leh army headquarter te thunun an inchuh a ni.
Buaina chhuah chhan ber hi civilian rorelna hnuaia thuneihna inhlanchhawn tur boruak vang a ni a. Army leh an elpui ber Rapid Supports Forces (RSF) te chuan airport leh Khartoum a sorkar hmun pawimawhte thunun zawkah an inchhal ve ve a, inkahna a nasa hle.
Army-te chuan RSF base indo thlawhnaa an beih thu sawiin Khartoum a mipuite chu pawnchhuak lo turin an ti bawk a, vansang atangin paramilitary forces te chu an thlithlai bawk a.
Khartoum mai bakah khawpui leh region hrang hranga inbeihna kal zelah civilian 50 chuangin nunna chan tawhin mi 595-in hliam an tuar tawh nia sawi a ni a.
Sudan hi October 2021-a sipai tena sorkar an paihthlak hnuah General te rorelna hnuaiah a awm a. Tuna inbeihna hi army units te de facto leader, GFen Abdel Fattah al-Burhan laka rinawm te leh RSF te, Sudan deputy leader, Mohamed Hamdan Dagalo, Hemedti tia hriat lar bawk te laka rinawmte inbeihna a ni.
Sudan armed forces te chuan ‘paramilitary RSF te thiah a nih hma chuan’ inremna awm theih nana inbiakna an kalpui dawn loh thu an sawi bawk.

-- Advertisement --

Inbeihna bultan dan?
October 2021 atang khan Sudan chu council of generals te thununna hnuaiah awmin sipai hotu lawk pahnih te chu thuneitu nih tum zawka nihna inchuh an ni a.
Gen Abdel Fattah al-Burhan chu head of the armed forces niin Sudan president dinhmun chelh ang a ni a. A deputy Gen Mohammed Hamdan Dagalo chu RSF leader a ni thung.
Hruaitu lawk pahnihte hi civilian rorelna hnuaia luh leh tumna kawnga Sudan kalpui zel dan turah an ngaihdan a inhmu lo va. An ngaihdan inhmuh lohna nasa ber chu RSF 100,000 lai te chu army-ah chhunfina force thar din tum a ni.

Eng vangin nge Inrinni atangin a intan?
A hmain RSF member-te chu Sudan ram chhung hmun hrang hrangah sem darhin an awm tawh a, chu chu Sudan army te chuan an tana pawi leh hlauhawm theiah an ngai a ni.
Inbiakna awm se harsatna chinfel a nih theih beisei a nih laiin inbiakna neih a ni thei lo va. Kar kalta Inrinniah tute zawk nge silai hmet puak hmasa hriat a ni lo va, mahse, buaina chuan zual lam a pan zel tura ngaih a ni thung.

Tute nge Rapid Support Forces te?
RSF te hi kum 2013-a din kha niin Darfur a rebel Janjaweed militia rapthlak tak te tudaitu an ni.
Khata tang khan gen Dagalo chuan force thiltithei takah siam chho zelin Yemen leh Libya-ah te pawh RSF chu tirh luh niin Sudan gold mine thenkhatte an thunun a.
Chutih rualin human rights bawhchhiaah puh ni tho bawkin June 2019 atang khan lungawilohna lantirtu 120 chuang tihlum tawhah puh an ni.
Army ni bawk si lo Sudan-in chutianga force chak leh thiltithei tak a nei chu Sudan ram ngelnghet lova siamtu tia sawi a ni.

Eng vangin nge sipai ten thuneihna an lak?
Tuna buaina hi kum 2019-a hun rei tak president nihna chelh tawh Omar al-Bashir paihthlak a nih hnua thil thleng zui vek a ni.
Khatih lai khan Sudan mipuite chuan kum sawm thum dawn a rorel tawhna chu duh lova nawr chhuah tumin kawtthlerah nasa taka lungawilohna lantir niin sipaite chu paihthla tura nawr nasat an ni.
Mahse, civilian tena an tum ber chu Sudan chu democratic rorelna hnuaia dah a ni a. Joint military-civilian sorkar din zui niin mahse chu chu October 2021 khan sipai chakna hmanga paihthlakin a awm leh zui ta a ni.
Khata tang khan Gen burhan leh Gen Dagalo te thuneihna inchuhna chu a nasa zual zel ta a ni. Civilian te kuta thuneihna a awm theih nan nikum December thla khan framework siam a ni a, mahse, ruahmanna kimchang siam tuma hmalakna chu a tlawlh zui ta a ni.

Eng nge thleng zui thei?
Indona kalpui zui zel a nih chuan Sudan ram chuan tuar nasa dawnin politics a buaina nasa zawk a thlen dawn bawk a.
Diplomats te chuan civilian rorelna a let a nih theih nan nasa takin an bei a, general pahnih te inbiakna dawhkan an kil theih nan theihtawp an chhuah bawk a. Chutih chhung erawhin Sudanese mi pangngai te chuan thlamuang lo takin hun an hman a ngai rih dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More