Dengue thihpui 7 awm tawh

Mizoramh dengue thihpui 7 an awm tawh a, kuminah thla thum chhungin he natna kai mi 132 hmuhchhuah an ni tawh.
May 16 kha National Dengue Day a ni a, sawrkar laipuia Ministry of Health & Family Welfare ruahman angin dengue laka mipui kan him theihna tur hriat tur tul inhrilhhriatna hun atan kum 2016 atang khan hman thin a ni. Mizoramah pawh hman a ni.
Aizawlah chuan Health & Family Welfare hnuaia National Vector Borne Disease Control Programme (NVBDCP) huaihawtin hman a ni a, Aizawl Municipal huamchhunga veng 166 atanga local council member-te nen dengue natna chungchang inzirtirna leh dengue pung zel tur ven nana khawtlang mipui nena thawhho dan tur zir ho a ni.
NVBDCP chhinchhiah danin, Mizoramah kum 2018 vel atang khan dengue natna kaihhnawihah hian record fel tak neih tan niin, hemi kum atanga kumin April thleng khan Mizoramah dengue kai mi 4406 hmuhchhuah an ni a, mi 7-in nunna an chan phah tawh.
Kum 2022 atang khan a hluar zual a, kum 4 hmalama hmuhchhuah zat belhkhawm aia tam – 1868 hmuh niin, mi 5-in nunna an chan phah. KUm 2023-ah he natna kai hmuhchhuah hi an tam lehzual a, 2060 hmuh niin, mi 2-in an thih pui a ni. Kuminah dengue kai 132 hmuh an ni tawh a, thihpui erawh an la awm lo.
Aizawl district chu dengue kai hmuh tamna ber a ni a, thihpui pawh he district ami vek an ni. Lunglei, Kolasib, Mamit leh Champhai district chu hmuhchhuah tam lehna deuh a ni.