Deptt sum tichingpentu Court-in thiam loh chantir
Law & Judicial Department hnuaia thawk department sum, vaibelchhe khat chuang tichingpentu chu court-in thiam loh a chantir a. A hremna October 30 ah a tichhuak ang. Law & Judicial department hnuaia sum chingpen nia hriatah he department under secretary hmingin Anti Corruption Bureau-ah 2018 September 24 khan FIR thehluh a ni a. ACB chhuizuina atanga a lan danin, he department-a LDC (muster roll) a thawk Lydia Lalhruaitluangi (27) chuan sum hi a tichingpen nia hmuh a ni.
Kum 2012 atanga thawk tanin, 2013 September khan cashier pui turin bill assistant mawhphurhna pek a ni a, sum a tihchingpen hi 2015 December atanga intan nia hriat a ni. Department sumpai, a tam berah chuan sawrkar ukil-te hlawh tur ‘professional services’ tih hnuai atangtein office bill lem, sanction order lem, a chunga thuneitu (under secretary etc) hming sign lem leh cash memo lem hmangin Rs. 1,06,90,916 a lo lachhuak hman a, ama bank account bakah a nu leh pa leh laizawnte account ah te dahlutin a mimal tan an account atang hian a lachhuak leh thin a. Hei vang hian a chhungte pawh hi he thubuaiah hian rin luh tel ve an ni nghe nghe.
Thubuai ngaihtuahnaah hian sawrkar lam thuhretu mi 24 thu zawhfiah an ni a, lehkha leh tul dang pawimawh 308 phawrh (exhibit) a ni. Thuhretute thusawi leh lehkha pawimawh buk a nih hnuah a ngaihtuahtu Prevention of Corruption Act Court special judge chuan Lydia Lalhruaitluangi hi sawrkara a mawhphurhna ama tana hman khaw lohna (section 13 (1) (a), (b)/13(2) PC Act 1988), a kuta mawhphurhna ama mimal tana hman khaw lohna (section 406 IPC), sum chungthuah a chunglama thuneitute bumna (section 420 IPC), inbumna atana lehkha lem siam (section 468 IPC) leh lehkha pawimawh lem a dik anga hmanna (section 471 IPC) te in thiamloh chantir a ni.
Hetih lai hian a laizawnnu, a nu leh pate chu dan a bawhchhiatna kawngah lo puibawma puhnaah finfiahna tha tawk a awm lo nia ngaiin court chuan he thubuaiah hian an thiam lohna a hmu lo a ni.
Sum tichingpentu Lydia Lalhruaitluangi hi a hna atang hian 2018 August 21 khan maipar thlawntir a lo ni tawh a ni.