DIKI’N MOBILE PHONE A NEI LO!

By Lallunghnema
Charity Lodge – 9862288182
Khatia Higher Secondery School Result a chhuah khan Mathematics Subject bikah kan thianpa tunu K.Lalrindiki (Khiangte), Thingsai khaw chhul chhuak dik tak chuan top- ten a inziak tlingin hlawhtlinna ropui tak a chang a. A hlawhtlinna lawmpui nan kan in, Charity Lodge-a lo leng tur leh thingpui sen min inpui turin ka sawm a.
Ni 22 chawhnu dar 4-ah chuan Diki chu a unaupa Duhawma nena lo kalin thingpui sen chu ka lo inpui ta a. Thla pawh kan la nual nghe nghe a ni. Ka lawm khawp mai. Ka lehkhabu ziah pahnih KIMNA KAILAWN leh CONSUMER 2020 chu ka lo present ve sasawi a nih kha!
Diki te nena programme tawite neiin thla kan la a. Chu kan hun hman dan mawl leh tawite chungchang chu tarlangin kan thlalakte chu WhatsApp Group hrang hrangah ka theh darh a. Ka Status-ah pawh ka dah nghe nghe a ni.
Lehkha thiam te, lehkha thiam thei nihte hi vanneihna a ni a. Mahse, taimaknat,chhelna te, tumruhnate, insumtheihnate tel lo chuan vanneihna hian min bosan thei tho mai a. Pathian malsawmna pawh hi a bawh pelh theih tho a ni.
Lehkha thiam thei nazawng hi an hlawhtling lem law, rilru chak an thiam bik ngai hek lo. A pawimawh ber chu zir tama beih hram hram a ni. Zir tama bei chiam tur chuan remchang insiam a tul thin a ni. Tih loh tur leh bansan tur pawh a awm thin. Lalrindiki hian phone a nei lo, a phone neih loh chu a zahpui hek lo. Hetiang mihring hi kan ngaisanga kan mamawh bawk. Ram, khawtlang, chhungkua, thiam zirna hmunte hian an mamawh a nih hi!
A lehkha zirna zin kawng hi a bumboh tih Diki hian a hre chiang a. A lehkha zirna tibuai thei apiang chu a thian fai zel a nih hmel khawp mai. A zirna tibuai thei bansan a, tawpsan tur thilte chu Diki hian a hmaih hauh lo.
He tleirawl pawisawi lo tak hian tha taka a lehkha zirna a, a insawr bing theih nan thutlukna a siam a ni ngei ang. A retheih em vanga cell phone nei zo lo a nih hmel loh, sawia mawi lo ni lo se, Diki hian thi a awrh ve tlat! Chu a thutlukna chu, ‘mobile phone neih loh,’ a ni ngei ang. Tleirawl naupangte, puitling ze ril tak neitu Lalrindiki, ka thianpa Lalcheuva tunu hian hetiang hian ka zawhna min chhang a. He kan Chatuan Zoram a Interview-na tawi ber zinga mi a ni ngei ang.
Kei mah : I phone number min hrilh thei em?
Lalrindiki : Phone ka nei lo.
Kei chuan : E heu, phone ka nei lo a!?
Diki :. Aw, phone ka hmang ngai lo.
Kei chuan: Ka ngaisang che a ni. Nang ang hi ka va hre lo ve! Mi bik i ni e.
Diki : E …ka lawm lutuk!
Hei hi kan inbiakna tawi tak, awmze nei erawh a ni. He nula, phone nei lo ngam khawpa lehkha zir thin hi kan chhuang a, kan chawimawi a nih hi! Chuvangin ka han pho chhuak a ni, entawn atan ka han pho chhuak a ni.
Kan tunlai khawvelah hian phone tel lo chuan kan khawsa thei tawh lo va. Kan thawh hlim atanga kan mut thleng hian mobile phone hian min thunun chu a ni ta ber mai. Kan life style-ah hian a bet nghet hle a ni. Naupang kum khat tling che che pawhin phone lem tal an hmang a. Kum thum an tlin meuh chuan mobile phone tel lo chuan an khawsa thei tawh lo a ni. Mobile phone tel lo chuan chaw tak ngial pawh an ei thei meuh tawh lo a nih hi!
Tunlai naupangte hi an vanduai hle a ni, ka ti hial thin. Khawvel thiamna sang lutuk hian an rilru a hruai khaw lo thei a, an taksain a tuar thei bawk. An puitlin zelna atan a tha lo tak zet a ni. A pawi em em mai a ni. Tichuan, Mobile phone-te chu an mit leh hnar an hriat bel tlukin an chul nel a. An nu leh pate pawhin kan khap lem lo niin a lang.
Mobile phone nei lo ngam khawpa mahni zirlai atchilh hi an tam lo awm e. Phone tel lova, khawsak zir thiam pawh a tul. Zirlai chuan a zir laiah insawr bing se, chu chu hlawhtlinna bul thut chu a ni. Ziaka zir hi a bang dawn chuang si lo. Hei hi ka telh duh Zirna Sikulahte hian phone ken khap vek se, a va lawmawm dawn em!
Mobile phone hi a tangkai hle, kei he thu ziaktu pawh hian ka hmang tangkai. Ka chhawr nasa! Inzir nan ka hmang nasa a, thil tam tak ka hriat theih phah a ni. Thu ziah nan ka hmang thin bawk. Cell phone hi thiam tam lo mah ila, ka nunah hian a bet ve tlat. Mahse, ka at chilh bur lo.
Mite angin phone kalphung hi hre viau lo mah ila, finna leh thiamna ka chhar ve thei tho tih ka hriat avangin ka chhawr hle a. Ka tangkaipui a ni. Mahse, phone hman chin tur ka neihah ka chiang a. Thu ho mai mai leh fiamthu satliah ka post ngai hek lo.Thutak thu bak theih ka nei lo tihna a nih chu. He Computer Zoramah hian chhiatna thlen tawka phone atchilh bur hi mi vanduai kan ti lo thei lo a ni.
Ka sawi tum ber chu kan zirlaite hian phone aiin an zirlai ngaina se, phone pawh hi nei lo ngam se, kan thupui pawh, ‘Phone tel lovin lehkha zir rawh’ tih hi a ni. Diki ang hian phone nei lo ngam se, hnawl ngam se, ka ti a ni!