CONGRESS PARTY – 2023 ELECTION MANIFESTO NO. 1 “|ANG PUIHNA” BIH CHIANNA

By: Lalmuanpuia Zawngte
Sawihawnna – Ramin hma a sawn dawn chuan a ram leilung hausakna neih leh mihring chengte eizawnna (Natural and Human Resources) milpuia dehchhuah a neiha, chumi hmanga intodelh leh a mamawh dang a tlakchhamte la lut thei dinhmuna a insiam a pawimawh hmasa a. Hetianga bungrua leh themthiamna te inthleng tawnna hi ‘In Sumdawn tawnna (Trade Off)’ an tih chu a lo ni ta mai a, silai mu tel lo indona hlauhawm ber an tih fo chu International Trade War hi niin ram pakhatin ram dang market vuak chhiat tum reng rengin khawvel ram hausa te hi an inel reng a ni tih kan hriat a tul awm e. Hetiang a nih avang hian Mizoram pawh tunlai khawvel insumdawn tawnnaah kan zuan luh ve theih nan kan insiamrem a kan insan mar hi a tul takzet tawh a ni.
Mizoram-a Agriculture pawimawhna
Mizoramah hian mipui za zela 70 chuang te hi agriculture-a innghat kan ni a, kum 2011 chhiarpui atanga a lan danin Mizorama hnathawk thei zawng zawng (Total Workforce) chu 486,705 a ni a, heta tanga za zela 55.76 (55.76%) chu thingtlang lo neih leh a kaihhnawiha eizawngte an ni. Tin, state sum thawh chhuah zawng zawng za zela 24.73 chu agriculture hian a tum bawk a, tin, Mizoramin bungrua leh ei tur a siam chhuah theih awm chhun te chu agriculture kaihhnawih atanga kan hmuh leh neihte an ni vek awm e. Hengte a nih avang hian Mizoram chu agriculture-a innghat a nihzia kan hre thei awm e.
Hmasawn nana Mizoram mamawh enge? – A chunga kan hmuh ang khian Mizoram mipui tam zawk innghahna chu agriculture leh a kaihhnawih eizawnna (Agriculture and Allied) te a ni a, Mizoram hmasawnna tak tak pawh a hril thui hle a ni. Kum 2011 census-in a tarlan danin Mizoram-a mihring 5,25,435 te chu thingtlang lama khawsa niin heta tanga mi 2,71,390 i.e., 51.66 % te chu thingtlang lo neih (Jhum Cultivation) a eizawng an ni. A awmzia ber ni a lang chu- Mizoramah hmasawnna tak tak thlentir tur chuan heng thingtlang kut hnathawkte dinhmun siam that leh dehchhuah tam zawk an lo neih theih nana theihtawpa tan lak hi sorkar mawhphurhna a ni chiang hle a ni.
Kum 2023 MLA Election-a Congress Party Manifesto chu Enge ni? – Congress Party Manifesto No.1 ‘|ANG PUIHNA’ hi a zavai chuan kan tar chhuak seng lo anga mahse a hlawm lian (main points) deuh deuh 4-te han tarlang ta ila –
1. Kut hnathawktu, hlawhtling mek leh hlawhtling mai thei dinhmuna ding, theihtawpa tang mekte tan – kawng tha,thlai chin uar tur bik siam, thlai hralhna leh thiar velna (Marketing & Transportation), thlai venhimna lam, etc., etc.,.
2. Sorkar ruahmanna hnuaia intodelh tura tang duh, mahnia bul tan ngaihna hre si lo te, tan nachang hre lote pawh zirtirna leh kaihhruaina pein hetiang hian chhawmdawl an ni ang.
3. |halai, sorkar hna hmuh loh avanga thawhchhuah nei thei loten, an thiam zawng leh theih zawng hmanga ei an hmuh theih dan tur kawng zawnsakin a tul anga chhawmdawl an ni ang – Targetted Skill Development, Entrepreneurship Development Programme, Technical leh Language Free Training kalpui a ni ang.
4. Mi vanduai bik te, rilru leh taksa lama harsatna neih avanga engti kawng maha tan la ve thei lote tan – Social Security Scheme kalpui a ni ang.
Manifesto Rintlak leh Hlawhtling thei tur a ni em? – A chunga Mizoram leh thingtlang kut hnathawkte dinhmun kan han tarlan takte atanga ngaihtuah chuan Congress Party Manifesto-2023 hi Mizoram hmasawnna tur atana innghahna lungphum’ tia sawi tlak a ni hial awm e. Mizoramah hian mihring 5,71,771 te chu khawpui (Urban Areas) a awm an ni a, a bak mihring 5,25,435 te chu thingtlanga awm an ni ve thung a, hetih lai erawh chuan Mizorama khawpui leh thingtlang dinhmun erawhchu a inthlau em em thung a ni. Tin, mihring nun leh hmun intluktlan lohna (Human and Regional Inequalities) la nasa lutuk hian Mizoram hmasawn lohzia chiang takin a rawn tarlang bawk a, heng intluktlan lohna tibo tur hian thingtlang hmasawnna tur a rang lama sorkarin a buatsaih char char hi tihmakmawh kan ti thei ang. Chuvangin, a chunga Congress Party Manifesto kan han tarlan takte khi harsa lutuk loa tihhlawhtlin mai theih thil te a nih bakah thingtlang hmasawnna kailawn rahbi hmasate an nih avangin a rintlak a, Mizoram tan hmasawnna bulpui leh innghah ngamna a tih theih awm e.
Dehchhuah Tam zawk engtin nge kan neih theih ang? – India ram ang bawkin Mizoramah hian mipui tam zawk fe chu thingtlang lo neih – kut hnathawka eizawng an nih laiin sum dehchhuah erawh chu za zela 24.73 chauh a ni a. Hei vang hian chaw leh sum chang thlai dehchhuah tam zawk dan tur ngaihtuaha tan lak sauh sauh hi a tul hle. Thlai chi hrang hrang kan lo thar chhuah theih nana thil tul hmasa leh rawtnate han tarlang ta ila –
1. Tlangram lo neih (Jhum Cultivation) hi Terrace Farming/Permanent Farming-a thlak,
2. Tunlai themthiamna (New Technologies) hman uar,
3. Hmun/Ram thar zuan zel lova leilung pangngai hmang reng thei tura buatsaih (Enhancing Soil Quality),
4. Lo neitu ten hma thar an lak zelna tura an mamawh sum pukna tur awlsam zawk siam sak leh an hlawhchham palh pawha invenna tur tha tak siam sak (Agricultural Credit and Crop Insurance) te,
5. Thlai thar dehchhuah te tih ralna tur ngaihtuah (Efficient Market).
Heng rawtna hrang hrang kan han chhawpchhuah takte hi a taka chantir tur pawhin thil harsa lutuk tur a awm miah lo a, Congress Party Manifesto – 2023 nen pawh nasa takin inanna thui tak a nei awm e.
Tlangkawmna – Mizoramah sorkar hrang hrang lo piang tawhin agriculture hmasawnna tur chuan hma an han la ve bawk thin nachungin hmasawn tur tak tak atana tih takzeta hmalakna erawh hmuh tur a la awm lo ti ila kan sawi sual awm lo ve. Amaherawhchu, Congress Party Pu Lalsawta kaihhruai ten Party Manifesto-a an chhawp chhuah tak te ngun taka han bih vang vang chuan thil lawmawm leh tih tak tak tumna a awm niin a lang a. Mizoram, a bik takin thingtlang kut hnathawktute tan chuan na taka bawh huam huam chi ni awm tak a ni.