Ding leh tura home minister nawrtu an awm
Hrangturzo bialtu Lalchamliana, home minister-in
inthlanpui lo awm turah thangthar zawkte a kian thei tih a sawi a, din a tum tawh lo tihnaah ngaih a ni. Mahse tun hnaiah ding tura nawrtu an awm a, awmzia a nei thuk em tih erawh hriat a har rih.
Hrangturzo biala MNF mi leh sa thenkhat leh mi dang thenkhatin an bialtupa hi ding leh turin an duh a, a din leh theih nan theihtawp an chhuah mek tih thu dawn a ni.
Hrangturzo bialah hian MNF block pahnih, East Block leh West Block an awm a, nikum khan block pahnihte hian conference neiin, an bialtu ding lai hi inthlanpui lo awm leh turah an bialah ding leh se an duh thu an lo sawi tawh. Thla hmasa khan an bialtupa hian thangthar a kian thei tih a sawi a, chumi hnu-ah chuan West Block lam hian nikum lama an dinnaah khan an la ding tih an sawi. East Block erawhin chutiang an sawi lo a, tunge ding ang tih chungchang pawh an buaipui tawh nia hriat a ni.
Thu dawn danin, June thla chawhma lamah khan East Block leh West Block hruaitute’n an bialtupa hi an len chilh a, chumi tum chuan nikum lamah thu a lo titlu tawh nia sawiin, chumi hnuah block pahnih hruaitute hian chief minister an hmu zui leh. Chief minister pawh hian tunge ding se tha ang tih a lo zawt nghe nghe.
Home minister hian thangthar a kian thei tih hi media-ah a sawi tawh a, an party hruaitu pakhat hnenah a sawi tawh. Chumi hnuah ding tura nawrtu an awm a, chu chuan awmzia a nei em tih erawh hriat a ni rih lo.
MNF hian inthlan lo awm tur atan Nomination Committee an din tawh a, Hachhek biala ding tur bak tihfel an la nei lo.
“Pu Chama hian a din tawh loh tur thu a sawi tihna pawh a ni chiah lo a, thangthar a kian thei tih a sawi a ni mai a,” MNF hruaitu pakhat chuan a ti.
Hetih lai hian Ex MNA Association lamin inthlanpui lo awm turah hian tuna MLA ni laite bakah zalenna suala rammu pakhat tal candidate awm belh se tih an rawt a, hei hi Nomination Committee member-te leh minister-te hnenah an thlen tawh. Hetianga thu an neih hnu hian an member pakhat chu Hrangturzo bialah a zin kual a, chumi hnu-ah Chalfilh bialah insawnin, vawi hnih a tlawh kual tawh tih thu dawn a ni.