District hnufual hi ZPM chuan chhanchhuah a duh – Lalduhoma

District hnufual hi ZPM
chuan chhanchhuah a duh
– Lalduhoma
Dampa bial chu India rama district hnufual leh changkang lo, aspirational district-a awm a ni a. ZPM chuan chhanchhuah an duh tih chief minister Lalduhoma chuan a sawi.
Dampa bial by election neih turah ZPM candidate Vanlalsailova tan Dampa West Block campaign chu Thawhlehni khan New West Phaileng-ah Lalduhoma hian a khuhhawng a. Dampa bial chu India rama district hnufual leh changkang lo, aspirational district a ni, tiin, “Hei hi ZPM chuan chhanchhuah che u kan duh a ni,” a ti.
Kum 38 vel chhung Congress leh MNF sawrkarna hnuaiah ruling bial an lo ni tawh thin a. Tuna hetiang dinhmuna an awm chhan chu a lo bial tawhtuten mawh an phur lo thei lo tih a sawi a. Opposition bial an ni chungin, Pu Vanlalsailova’n an mamawh leh tihsak ngai a rawn thlen thin tih chief minister hian a sawi.
“Theihtawp a chhuah thin a. Special Priority Project hnuaia hna pawh min rawn dil a. Chumi hnuaiah chuan khaw tinin hna in thawk mek a ni. Ka bial aiin in vannei,” a ti.
Mizorama by-election awm tawhah ruling party an chak deuh vek a, hmun hnihah opposition an chak tih Lalduhoma hian a sawi. “Phuldungsei-ah opposition an lo chak tawh a, chu chu boruak dang daih a ni. Serchhip bialah MLA atanga min ban avang khan by-election a awm a, he inthlanah hian kan chak. Engemaw thil danglam bik a thleng a nih loh chuan ruling party chanah dah a ni deuh thin. Dampa bialah pawh chutiang chu a kan beisei,” a ti.