June 26 kha United Nations hriatpuia khawvel pum huap ruihhlo dona ni “International Day Against Drug Abuse and Illicit Trafficking” vawi 34-na a ni a. Hemi denchhen hian Aizawl District Police buatsaihin Millennium Centre Dawrpui atanga Aizawl SP office Treasury Square thleng kawng zawh (rally/ walkathon) a ni a. Modern English School zirlaite leh Aizawl DEF hnuaia thawkte bakah Aizawl Traffic Police te an tel.
Kawng zawh vailiamtu DIG (Northern Range) Lallianmawia chuan heroin chu tunhma in hawng khat vel ang lek lek an man thin laiin, tunah chuan a kg (kilogram) zawngin kan man fo ta chu a lungchhiatthlak tih a sawi a. Ruihhlo zuarten thalaite, a bikin lehkha zirlai la naupang tak takte an bitum thin tih sawiin, “Tunhnaiah ruihhlo zawrhna man a tlahniam a, hei hi a zuartute sumdawn tumna a ni a, man tlawm zawka an zawrh hnu ah damdawi ngai thar an tam veleh a man an tisang leh ngei ngei dawn a, chu chuan rukruk leh pawikhawihna tam tak a hring chhuak dawn a ni,” a ti.
Zirchiannaah, ruihhlo ngai zinga a tam ber chu an thianten an tih vanga tih ve chhin chak an ni a, tih ve chhin loh hrim hrim chu a him ber tih sawiin, ruihhlo laka an inthiarfihlim ringawt pawh hian ram leh khawtlang tan nasa takin hna an thawk nghal tih a sawi a ni.
Kawngzawh tawpna hi Aizawl bawrhsap Dr Lalhriatzuali Ralte chuan a hmanpui thung a. Kawngzawh kharnaah hian ruihhlo do kawnga thawk tha mi pathum – Vaivakawn PS O/C Inspector Dhian Singh Minhas, Sairang PS O/C SI J Lalchungnunga, Aizawl DEF hnuaia DSB SI T Thuamchungnunga te hnenah chawimawina thuziak hlan a ni.
Ruihhlo dona pualin kawng zawh
Get real time updates directly on you device, subscribe now.
Prev Post