Zirtawp tlai khan Australian Open 2023, mipa semi-final khelh a ni a. Karen Khachanov hnehtu Stefanos Tsitsipas chuan final ah fiahna hautak a hmachhawn dawn a, Australian Open a vawikua zet champion tawh Novak Djokovic a hmachhawn dawn. Grand Slam a vawi 21 champion tawh Djokovic hian semi-final-a a khingpui Tommy Paul chu set hloh lo vin a hneh. Final a chak zawk zawk hi World No. 1 an ni zui nghal ang.
-- Advertisement --
Tsitsipas a kal zel
Tennis ah player ropui bik pathum an awm a, chungte chu; Rafael Nadal, Novak Djokovic leh Roger Federer te an ni. Anni pathum hi ‘Big three’ tiin sawi an ni thin bawk. Big tih lohah chuan Greek tlangval Stefanos Tsitsipas hi talent nei tha, Grand Slam ah champion tam thei tur zinga ngaih zingah a tel. A backhand a that em vanga ‘Federer thar’ an tih mai Tsitsipas hi a thinchhiat a, dawhtheihna a neih loh thin vangin beisei angin inelna lianah a champion mai thei lo thung. Australian Open 2023 ah player thate an tlak sup sup laiin ani erawh chu a kal zel a, a vawi hnih nan Grand Slam final a lut ta nawlh.
World No. 1 thar ni thei dinhmuna ding mek Tsitsipas hian semi-final ah Russian Karen Kha-chanov a hmachhawn a, inkhel hmuhnawm takah harsa takin a chak.
Greek thrid seed Tsitsipas leh Khanchanov te hi set khatnaah an inhnehtawk nghal viau a, tie-break khelh a ngai nghal pang. Tie-break ah Tsitsipas a chungnung zawk a, harsa takin set khatna a la. Harsa taka set khatna a lak hnuin set hnihnaah a chetha sauh a, break a neih chhawr tangkaiin, set ala zui leh. Set hnih a lak zawn hnuin set hloh lova chak mai thei dinhmunah a ding hman a. Chak theihna hun remchang a neih a chhawr tangkai zawh loh vangin tie-break ah hnufual zawkah a tang a, set a hloh ve thung.
Dinhmun derthawng taka ding chung a dam khawchhuah hram hnuin Khanchanov a phur thar viau nanga a phur rei lo viau thung. Set linaah tha zual zawkin Tsitsipas a inlan zui a, break vawihnih a neih chhawr tangkaiin set la zui leh a. Russian Star Khanchanov lakah 7-6 (7-2) 6-4 6-7 (6-8) 6-3 a chakin Grand Slam ah a vawi hnih nan final a lut.
Dal theih loh Djokovic
Dam chiang lo chunga inlan Novak Djokovic a khel tha deuh deuh zel. Australian Open-a a vawi 10 nan champion tuma hma lam pan mek Djokovic hian semi-final-a a khingpui Tommy Paul chu awlsam taka hnehin final a inhlangkai.
Australian Open ah ropui taka khel thin Djokovic hian Paul lakah tha zetin bul a tan a, set khatnaah 5-1 a hma an hruai in, awlsam takin set khatna a la ngei tura ngaih a ni hman. 1-5 zet hnufual tawh Paul hi huaisen takin a inlan a, khingpui hautak Djokovic hi tha zeta bei let in, vawi hnih ngawt a break zawn a mai a, 5-5 a ni ta der. A khelh that chhoh em vangin Paul tantute au thawm a ring hman hle. Boruak sang tak hnuaiah rilru huaisen Djokovic ropuina a lang nawn leh thung. Serb hian 6-5 a hma a hruai hnuin break pawimawh zet mai a nei a, harsa takin set khatna a la phawt.
Tommy Paul hi set khatnaa beiseiawm takin inlan bawk mahse, set hnihna leh set thumnaah erawh Djokovic a khan lo ta viau thung. Nole hian set hnihnaah break nei zawn chungin bul a tan a, game khat chauh hlohin set a la. Set thumnaah pawh a khingpui serve break in bul a tan leh a, game hnih chiah hloh chungin set la zui leh a. A vawi 10 nan Australian Open final lut turin semi-final-a a khingpui Tommy Paul chu 7-5, 6-1, 6-2 a hnehin a chak zui ta a ni.
Awlsam taka Tommy Paul hnehtu Novak Djokovic hi Australian Open ah vawi 27 a chak zawn ta chiah a. Australian Open a chak zawn rei ber record thar a siam. Australian Open ah hian champion ngun ber a ni mek a, Tsitsipas a hneh zui leh a nih chuan vawi 10 a champion tling chiah in, Grand Slam a champion ngun ber Rafael Nadal a nihrual chiah bawk ang.
Djokovic vs Tsitsipas
Pathianni tlaiah final a intumtur Novak Djokovic leh Stefanos Tsitsipas hi vawi 12 an inhmachhawn tawh a. Djokovic hi vawi 10 zet chak zawkah tang tawhin, an pahnih inkarah a chung zawk rih viau. An intum hnuhnung ber chu ATP Finals 2022 ah niin Djokovic hian 6-4 7-6 in hnehna a chang. Grand Slam final ah vawikhat intum tawhin French Open 2021 final-ah an inhmachhawn a, hemi tum hian set hnih la hmasa mahse Tsitsipas hi tlawm zawkah a tang tho thung a. Rolland Garros-a a tlawmna kha Melburne Park ah chhanglet in, Djokovic kawng dal a tum hle ngei ang.
Hetihlai hian Tunhnaia a hneh theih loh Djokovic hneh hi Tsitsipas tan thil harsa tak a ni ngei dawn. Djokovic hi tum hnih lo hneh ve tawh bawk mahse a hneh hnuhnun ber tum chu kum 2019 daih tawh kha a ni a. Serb a hnehna hi Out-door hard court ve ve a ni a. Indoor-ah a la hneh ngai miah lo thung. Australian Open khelhna hi Djokovic a khelh thiamna a ni zui cheu mai si a, World No. 1 thar ni thei dinhmuna ching Tsitsipas tan hmabak a hlau tak hle dawn thung.
Tarlan tawh angin Australian Open 2023 final a chak zawk zawk hi mipa lamah World No. 1 thar an ni dawn. Final-a intum tur Djokovic leh Tsitsipas te hian World No. 1 ni mek Carlos Alcaraz chu ranking point ah an lehpel ve ve tawh. Kum 2022 ah inelna hmachhawn thei lo Djokovic hian semi-final a thlen vangin point 1200 a hmuh belh tawh a, a champion chuan point 800 a hmuh belh leh ang. Point 800 a hmuh belh leh a nih chuan tuna a point khawl tawh 7070 nen belhkhawmin point 7870 a khawl tling ang.
Greek tlangval Stefanos Tsitsipas hian final a luh vangin point 480 a hmuh belh tawh a. Ranking Point 6995 a khawl tling tawh a, a ni pawh hian No. 1 ni mek Carlos Alcaraz a pel fel tawh bawk. Final pawimawh takah Novak Djokovic a hneh a, inlehthalna lian a thlentir thei a nih chuan Grand Slam ah a vawikhat nan a champion ang a. A vawikhat nan vek ATP No. 1 a ni zui nghal dawn bawk.
Australian Open 2022 hmachhawn thei thei Novak Djokovic-a’n ranking point 1200 ngawt hmuh belh tawh lai hian 2022 a champion Rafael Nadal erawh chuan a tlak hma vangin point a hloh teuh thung a. Nadal hian Australian Open khelh hmaa point a khawlsa atangin point 1955 zet paihsak a ni ve thung a, ranking ah pawh a hniam phah duai thei dawn a ni.