Document lem bawk…
Education department-in primary school-a casual teacher an laknaah MTET(Mizoram Teacher Eligibility Test) certificate lem hmang an hmuchhuak a. Education Addl. Director chuan office order tichhuak nghalin cancel a nih thu tarlan a ni. He thil thleng chungchang hi enzui a nih tur thu education minister chuan a sawi nghal bawk.
Kan hriat angin kan hnung lawk June thla tir lam khan Mizorama National Health Mission hnuaia dental surgeon hnathawk mek pakhat chu hna a thawh hnu kum khat chuang zet hnuah document lem hmanga hna hmu a ni tih hriatchhuah a ni a, sawrkarin action an lak hmain amah zawkin banna a thehlut a, sawrkar lam chuan an lo pawmsak ve mai a. Hemi chungchangah hian eng tin nge sawrkarin action a lak zui tak zel hriat a la ni lo a. MZP lam chuan he thil thleng ang hi department dangah pawh thleng zel thei a nih avangin an enzui tur thu an sawi nghe nghe a nih kha.
Dental surgeon certificate lem manchhuah atanga thla khat awrh chauh a liam tihah, MTET certificate lem hmuhchhuah a ni leh ta mai a. Tun ami hi chu hna a la thawh tak tak hma deuha hmuhchhuah a ni a, dental surgeon ai kha chuan a la zia deuh hret; mahse, fimkhur a pawimawhzia hriat a nih tawh hnuah pawh, document screening lamah a kaihhnawih hnathawktute an la vuaicha deuh niin a lang. He hna dilnate thehluh a nih hian, hna lak a nih hmain document-te a fel leh fel loh endik hmasak vek awm tak a nih laiin, hna lak hnuah ‘a lem’ tih hmnuhchhuah a ni ta chauh hi chu inenfiah kan ngai tih a lang.
He thil thleng hi chhui chian a, thil a thlen dan chipchiar taka puanzar a pawimawh dawn hle. MTET certificate lem hi a hmangtu hian amah kutzala a siam chawp nge, official lam mi thenkhat nen inthuruala thiltih? tih hi hriatchian ngai chu a ni ta a. Chutih rualin, hna lakna turah, dilna lehkhaa thil tel ngai document-te a dik felfai leh felfai loh endik hmasa lova kalpui ngawt mai hi a dik lo hle tih a lo lang leh ta a ni.
He thil thleng chungchanga education minister-in enzui a nih tur thu a sawi hi a result mipui hnenah phochhuah leh ngei ni se, thil thlen dan, a bul atanga a tawp thleng hriat hi mipuite right a ni.