DoNER hotuin ‘Education Hub’ atan Mizoram a awt

On Aug 6, 2026 0 0

DoNER secretary chuan Mizoram chu ziak leh chhiar tamna ram, boruak nuam tak a nih avangin ‘Education Hub’ atan Mizoram a awt tih a sawi.
New Delhi-a cham mek minister Lalnghinglova Hmar chuan a department chan kaihhnawihah Nilaini khan Ministry of Development of North Eastern Region (DoNER) hotute a kawm a, ministry hnuaia Mizoram project hrang hrang chak zawka kalpui dan tur sawipuiin, hmasawnna kal mek leh hmachhawp an sawiho.
Tourism minister hian DoNER secretary Katikithala Srinivas kawmin, Mizoram sawrkar hmachhawp hrang hranga an ministry kaltlanga bawhzui theih awmte an sawidun a. A bikin sports leh tourism-a hmachhawp sawiin, Aizawl chu India ram thlasik khawpui ni thei tura hma la in, December thlaah Winter Festival liantham buatsaih an tum a. An theihna in a tlin piahlamah chuan ministry puihna an mamawh dawn tih a hrilh.
NESIDS-OtRI hnuaiah Mizoram combat sports zawng zawng hman theih tur ‘Centre of Excellence’ project sanction a ni chu lawmawm a tih thu a sawi a ni.
DoNER secretary hian a theihna apiangah Mizoram pui turin ministry a inpeih tih minister hi a lo hrilh a. Mizoram chu ziak leh chhiar tamna, sik leh sa nuam leh hmun mawi tak a ni a. Zirna in tha din leh a awmsa tichangtlungin, ‘education hub’ ni turin theihna a nei, tiin, state pawn atanga zirlaiten an pankhawm chuan khawtualmite eizawnna leh state economy thlenga a hlawkpui thei dan tur an sawi a ni.
Minister chuan DoNER ministry hnuaia tourism project thehluh chungchangah a buaipuitu joint secretary Dr Vipul Aggarwal leh statistical advisor Dharmvir Jha pawh kawmin, project dinhmun leh state sawrkar atanga hmalak ngai awmte a sawipui a, bawhzui ngai an bawhzui nghal. Mizoram football hmasawnna tur project thehluh tawh dinhmun pawh an sawiho nghal bawk.
Sports minister Lalnghinglova Hmar hian NESIDS-OtRI scheme hnuaia ‘Boxing Centre of Excellence’ sak tur chungchangah scheme enkawltu deputy secretary Silabhadra Das pawh kawmin, chak zawka hmalak dan tur a sawipui nghal a ni.
Contact sports hrang hrang hmunpui ni thei tur, cheng vaibelchhe 38.4 senga sak tur Centre of Excellence hi kumin May 19 khan sanction a ni a, tunah hian tender chhuah tura buaipui mek a ni.