Cooperative movement lian zawk kalpui kan duh – Cooperation minister

Mizoramah ‘Cooperative Movement’ lian zawk kalpui an duh a, chu chu state economy pawhin a thatpui an beisei tih Cooperation minister PC Vanlalruata chuan a sawi.
Nilainia Khawzawl District Cooperation office a hawnnaah PC Vanlalruata chuan, cooperative movement lian zawk kalpui an duh a, hei hi Mizoram economy pawhin a thatpui an beisei tih a sawi. Cooperative movement chu thalai zingah nasa takin campaign an nei chho a, NABARD nen pawh cooperative movement tichak tura tan la hoin, NABARD hian kumtin sumfai nuai tam tak cooperative society-te training-na tur leh cooperative movement tihchakna turin an pe a, PACS leh MPACS enkawlpuiin a tul angin farmer-te banah an kai tih a sawi.
Mizoramah cooperative society kan neih zingah tam tak an nung tha tawh loa, kal ngaihna pawh hre lo an ni. Heng hi tih that leh thuamthat a, training mumal tak pe a, society changtlung taka hlan chhoh an tum tih a sawi a. Mizoramah farmer-ten kawng hrang hrangah ei an zawng a, anmahni enkawl a, kaihruai tura cooperative movement tihchak a pawimawh tih a sawi bawk.
District Cooperative office hawn zawh hian bawrhsap pisa kawtah District Hospital tan ambulance hlan leh a vailiam chu minister hian a hmanpui a. Khawzawl chu district thar a nih angin healthcare infrastructure mamawhna a nasa a, emergency transportation tha zawk leh damlo referral service tha zawk neih a tul zia ngaihtuahin MP leh district administration hmalaknain NHIDCL-ah thlenniin, cheng nuai 15 saction hmuh a ni a, a tul ang ang tihfel a nih hnuin ambulance hi lei a ni. Lirthei, insurance, registration leh thil tul dang siamna atana sum hman zawng zawng nuai 13.87 vel niin, a bang nuai 1.13 vel la awm chu ambulance tana emergency medical equipment pawimawh leina atana hman phalna dil mek niin, phalna hi pek a nih chuan portable ECG machine, battery backup system leh anti-choking device adt. lei tum a ni. Phalna pek a nih loh chuan NHIDCL hnena pek kir leh tur a ni.